გუანტანამოს ციხის პატიმარი ინაიათულა საკუთარ საკანში მოკლული იპოვეს. ამის შესახებ Agence France-Presse- იტყობინება.
როგორც პენტაგონის მიერ გავრცელებულ ოფიციალურ განცხადებაშია აღნიშნული, საკნების შემოვლის დროს მცველებმა შენიშნეს, რომ პატიმარს სიცოცხლის ნიშნები არ ემჩნეოდა. მისთვის დახმარების აღმოჩენას შეეცადნენ, თუმცა ამან შედეგი ვერ გამოიღო. ძირითადი ვერსიის თანახმად, პატიმარმა თავი მოიკლა. თუმცა თვითმკვლელობისთვის რა საშუალება გამოიყენა, არ კონკრეტდება.
ცნობისთვის, ინაიათულა ციხეში 2007 წლის სექტემბერში მოხვდა. აშშ-ის სამხედროები მიჩნევდნენ, რომ იგი "ალ-ქაიდას" ტერორისტული ოპერაციების დაგეგმვაში მონაწილეობდა. ამასთან, ბოევიკების გადაადგილების მარშრუტს გეგმავდა და მათი საბინაო და სატრანსპორტო საკითხებით იყო დაკავებული.
შეგახსენებთ, ინაიათულა რიგით მერვე პატიმარია, რომელიც გუანტანამოს ციხეში დაიღუპა. იგი მეექვსე ტუსაღია, რომელმაც სიცოცხლე თვითმკვლელობით დაასრულა. გუანტანამოს ციხე 2001 წლის 11 სექტემბრის ტერაქტის შემდეგ ჯორჯ ბუშ-უმცროსის ადმინისტრაციის დროს გაიხსნა. ამჟამინდელმა პრეზიდენტმა ბარაკ ობამამ არაერთგზის განაცხადა, რომ ციხეს დახურავდა, თუმცა დანაპირები დღემდე არ შეუსრულებია.
