"სპექტაკლ "ხანუმასთან" დაკავშირებით ბაქოელი მაყურებლის რეაქციას მოუთმენლად ველი", _ განაცხადა რეჟისორმა გოჩა კაპანაძემ აზერბაიჯანული მედიისთვის მიცემულ ინტერვიუში.
რეჟისორის თქმით, მისი სურვილია, ბაქოელებს არაერთი თბილისური დადგმა აჩვენოს, რაც აქტიორულ და რეჟისორულ შესაძლებლობებს წარმოაჩენს. საუბარია სპექტაკლებზე - "ბერნარდა ალბას სახლი", "მედეა", "მარია სტიუარტი", "კვარტეტი". ეს უკანასკნელი ლეონკავალოს ოპერის "ჯამბაზის" მიხედვით შეიქმნა.
მისი თქმით, მისთვის დიდი სიამოვნება იყო, როცა ავთანდილ ვარსიმაშვილის თავისუფალ თეატრში რეზო გაბრიაძის პიესის მიხედვით, კარგი სპექტაკლი დადგა, სახელწოდებით "მონტეროზას ბრილიანტი". რეჟისორის აზრით, ეს სპექტაკლი, გარკვეულწილად, განთქმული "ხანუმას" გაგრძელება იყო და მის პერსონაჟთა თავგადასავალს აგრძელებდა.
შეგახსენებთ, კაპანაძე ბაქოში ავქსენტი ცაგარელის სპექტაკლ "ხანუმას" დადგმის მიზნით სპეციალური მიწვევით იმყოფება. რეჟისორმა ხანუმა სულ სხვა ჭრილში დაინახა, მისეული ხანუმა შეყვარებულია. სპექტაკლი სპეციალურად აზერბაიჯანის სახალხო არტისტ აფაქ ხანუმისთვის დაიდგა. მასში აზერბაიჯანის რვა სახალხო არტისტია დაკავებული.
