აშშ-ის იუსტიციის სამინისტრომ სისხლის სამართლის საქმე აღძრა იმ პირთა მიმართ, რომლებიც ძვირფასი ავტომანქანების შესყიდვისას თაღლითობაში არიან ეჭვმიტანილნი.
ბოროტმოქმედთა გამოვლენით, რომლებიც რუს დიპლომატებად ასაღებდნენ თავს, სამართალდამცავები სახელმწიფო დეპარტამენტის მხრიდან შეტანილი საჩივრის შემდეგ დაინტერესდნენ.
გამოძიების ვერსიით, თაღლითებს დიპლომატიური სტატუსი სჭირდებოდათ, რათა ავტომობილებზე ფასდაკლება მიეღოთ. მათ განსაკუთრებით Porsche Cayenne და Lexus-ი აინტერესებდათ. მოგვიანებით კი ამ მანქანებს ძვირად ყიდდნენ. 2011 წლის თებერვალში თაღლითებმა 6 ავტომანქანა შეიძინეს.
დამნაშავეთა ჯგუფი მაშინ გაიშიფრა, როდესაც ჩრდილოეთ კაროლინის ავტოსალონ Performance Auto Mall-ის თანამშრომელმა მასთან მისული "რუსი დიპლომატის" ვინაობის გადამოწმება გადაწყვიტა. მან კლიენტის საპასპორტო მონაცემები სახელმწიფო დეპარატამენტს გადასცა, რის შემდეგაც გაირკვა, რომ რუსი მყიდველი ვაშინგტონში მდებარე მალაიზიის საელჩოს თანამშრომლის პირად მონაცემებს იყენებდა. ამის შემდეგ სახელმწიფო დეპარტამენტმა იუსტიციის სამინისტროს მიმართა.
აღმოჩნდა, რომ დამნაშავე ვლადიმერ ტიმკი იყო. ამასთან, იუსტიციის სამინისტროში ეჭვობენ, რომ ტიმკი ამ ბანდის მეთაურიცაა. მისი თანამზრახველები არა მარტო რუსეთის საელჩოს თანამშროლების რეალურ მონაცემებს იყენებდნენ, არამედ გამოგონილი სახელებითაც სარგებლობდნენ.
ამ ეტაპზე ცნობილია, რომ დამნაშავემ უკრაინაში გაქცევა მოახერხა. უცნობია, გამოავლინეს თუ არა მისი თანამზრახველები.
