რამდენიმე წლის განმავლობაში აშშ-ის ხელისუფლება ეგვიპტისა და ტუნისის საინვესტიციო გარემოს გაუმჯობესების მიზნით 1 მილიარდი დოლარის გამოყოფას აპირებს.
როგორც Reuters-ი იტყობინება, ამის შესახებ დღეს აშშ-ის პრეზიდენტმა ბარაკ ობამამ ახლო აღმოსავლეთისა და ჩრდილოეთ აფრიკაში მომხდარ ცვლილებებთან დაკავშირებით სიტყვით გამოსვლისას განაცხადა.
"მივიჩნევთ, რომ ის შეთანხმებები, რომლებიც ვალის ტვირთის შემსუბუქებასა და ინვესტიციებს შეეხება, მთლიანობაში, რამდენიმე წლის განმავლობაში, დაახლოებით 1 მილიარდ დოლარად უნდა შეფასდეს",_აღნიშნა თეთრი სახლის წარმომადგენელმა ობამას განცხადების კომენტირებისას.
მისი თქმით, დამატებითი ფინანსები საერთაშორისო განვითარების ბანკებიდან წამოვა, რაც რამდენიმე მილიონს შეადგენს. ამასთან დაკავშირებით, თეთრი სახლის წარმომადგენელმა განაცხადა, რომ საერთაშორისო ფინანსურ სტრუქტურებს დიდი როლი აკისრიათ, რადგან მათ ის გამოცდილება აქვთ, რომელიც ცენტრალური და აღმოსავლეთ ევროპის ქვეყნების გარდამავალი პროცესების დროს დაუგროვდათ.
"მსოფლიო ბანკი, საერთაშორისო სავალუტო ფონდი, აფრიკის განვითარების ბანკი, სხვა პარტნიორებთან ერთად, ჩვენთან თანამშრომლობს, რათა ამ სახელმწიფოებს მათი ეკონომიკის ტრანსფორმირებაში დახმარება აღმოვუჩინოთ",_ასეთნაირად გადმოსცა ობამას სიტყვები თეთრი სახლის წარმომადგენელმა.