საჩხერის რაიონის სოფელ ჭალოვანში რუსი სამხედროების მიერ დაჭრილი 17 წლის ახალგაზრდა გვიან ღამით თბილისში, რესპუბლიკურ საავადმყოფოში გადმოიყვანეს.
გადაუდებელი ოპერაცია გიორგი ლომსაძეს საჩხერის საავადმყოფოში ჩაუტარდა, თუმცა მდგომარეობის სიმძიმის გამო მისი დედაქალაქში გადმოყვანა გახდა საჭირო. ექიმების განცხადებით, პაციენტის მდგომარეობა მძიმეა, თუმცა მკურნალობას ექვემდებარება. დაზარალებული ამ დრომდე რეანიმაციულ განყოფილებაში რჩება.
ღამითვე დაჭრილი ჯანდაცვის მინისტრმა ანდრია ურუშაძემ მოინახულა. შემთხვევა გუშინ საჩხერის რაიონის სოფელ ჭალოვანში მოხდა.
საოკუპაციო ხაზთან ახლოს 5 ქართველი ჯონჯოლს აგროვებდა, როდესაც რუსმა ოკუპანტებმა ცეცხლი გაუხსნეს. ინციდენტის დროს ორი ქართველი მძიმედ დაიჭრა.
ამ დრომდე გაურკვეველია ორი დღის წინ ინციდენტის ადგილიდან გაუჩინარებული ოთხი ადამიანის ბედი. ადგილობრივი მოსახლეობის ცნობით, ჯვრის უღელტეხილზე ჩოლთოს ხეობაში მყოფები მათ ტელეფონით დაუკავშირდნენ და აცნობეს, რომ ოკუპირებულ ზონაში არიან და უკან დაბრუნებას გუშინ სოფელ ჭალოვანში მომხდარი ინციდენტის შემდეგ ვერ ახერხებენ.
გვიან ღამემდე გაგრძელდა ინციდენტში მონაწილეთა დაკითხვაც. იმ სამ ახალგაზრდას, რომლებიც ოკუპანტების თავდასხმას უვნებლად გადაურჩნენ, პოლიცია რამდენიმე საათი კითხავდა.
მომხდარის შესახებ დეტალურად ჰყვება ქუთაისის საავადმყოფოში მოთავსებული 28 წლის შოთა შუბითიძე. სწორედ მას მოხვდა ოკუპანტების მიერ ნასროლი პირველი ტყვია.
სოფელ ჭალოვანში მომხდარი ინციდენტის დროს დაჭრილები გვიან ღამით იმერეთის გუბერნატორმა მოინახულა და დახმარება აღუთქვა.
