საქართველოს იუსტიციის სამინისტროს ეროვნული არქივის ხელმძღვანელი თეონა იაშვილი დღეს პოლონეთში, ვარშავაში გაემგზავრა, სადაც მონაწილეობას მიიღებს იუნესკოს მსოფლიო მეხსიერების პროგრამის IV საერთაშორისო კონფერენციაში `კულტურა _ მეხსიერება _ იდენტურობა~.
კონფერენცია შეეხება კულტურათაშორის ურთიერთობებს, მსოფლიო მეხსიერებას, იდენტურობასა და თანამედროვე მსოფლიოს გამოწვევებს. ღონისძიების ფარგლებში მონაწილეებს შორის გაიმართება დისკუსიები დოკუმენტების ფორმით დაცული კაცობრიობის მემკვიდრეობისა და კულტურული მრავალფეროვნების შესახებ.
კონფერენციის მონაწილეები ასევე ეწვევიან პოლონეთის ეროვნულ ბიბლიოთეკას, ებრაული ისტორიის ინსტიტუტსა და საისტორიო ჩანაწერების ცენტრალურ არქივს.
ღონისძიების ორგანიზატორები არიან პოლონეთის კულტურისა და ეროვნული მემკვიდრეობის სამინისტრო და მსოფლიო მეხსიერების პროგრამის პოლონური კომიტეტი, იუნესკოს პოლონური კომისია, პოლონეთის სახელმწიფო არქივის ცენტრალური ოფისი, ეროვნული კულტურული ცენტრი.
კონფერენციაში მონაწილეობას 50-მდე ქვეყნის სამეცნიერო დაწესებულებებისა და სხვადასხვა საერთაშორისო ორგანიზაციის წარმომადგენლები მიიღებენ.
