2010 წლის სახელმწიფო ბიუჯეტის 26% შრომის, ჯანმრთელობისა და სოციალური დაცვის სამინისტროს მოხმარდა. ამის შესახებ საპარლამენტო კომიტეტებში 2010 წლის მთავრობის ანგარიშის განხილვისას ფინანსთა მინისტრის პირველმა მოადგილემ პაპუნა პეტრიაშვილმა განაცხადა.
"2010 წლის ბიუჯეტი დაიხარჯა იმ პრიორიტეტებზე, რომელიც თავიდანვე იყო დამტკიცებული. ეს არის ინფრასტრუქტურული პროექტების დაფინანსება, რომელიც ეკონომიკის განვითარებას შეუწყობს ხელს", - აღნიშნა პეტრიაშვილმა.
მისი თქმით, გასულ წელს სახელმწიფოს ერთ-ერთი პრიორიტეტული სფეროს ჯანდაცვის სამინისტროს დაფინანსებას სახელმწიფო ბიუჯეტის 26%, 1 მილიარდ 500 მილიონ ლარზე მეტი მოხმარდა. მისი თქმით, 2010 წელს საქართველოში პირდაპირი უცხოური ინვესტიციები 500 მილიონ დოლარამდე შემოვიდა.
"იმ მაკროეკონომიკური ზრდის ფონზე, რომელიც მიმდინარე წელს აღინიშნება, მეტ ინვესტიციას ველოდებით 2011 წელს", - აცხადებს ფინანსთა მინისტრის მოადგილე.
შეგახსენებთ, 2010 წლის სახელმწიფო ბიუჯეტის შემოსავლების გეგმა 5,363,552.6 ათას ლარს შეადგენდა.
