საქართველოს პირველი პრეზიდენტის ვაჟი ცოტნე გამსახურდია აშშ-ის სახელმწიფო ადმინისტრაციას მიმართვას უგზავნის.
როგორც „ჯი-ეიჩ-ენს" გამსახურდიას ადვოკატმა, ქეთი ბექაურმა განუცხადა, მიმართვა დაკავებულმა დღევანდელ პროცესზე გაავრცელა.
„მიმართვაში ცოტნე გამსახურდია მიუთითებს იმ გაუსაძლის პირობებზე, რაც სასჯელაღსრულების დაწესებულებაში არსებობს. ამასთან, საუბრობს პატიმართა ცემის, წამების და მათ მიმართ არაადამიანური მოპყრობის ფაქტებზე. ყურადღებას ამახვილებს იმაზე, რომ ასეთი ქმედების ჩამდენი არც ერთი პირი დასჯილი არ არის. ამასთან, მიმართვაში ლარაპაკია იმ იზოლაციაზე, რომელშიც ცოტნე გამსახურდიამ ხელისუფლება მოაქცია - ის საკანში უკვე წელიწადზე მეტია მარტოა მოთავსებული, არ მიეწოდება პრესა, არ აქვს მიმოწერის და კომუნიკაციის არანაირი საშუალება. ერთი სიტყვით, მიმართვაში აღწერილია ქართული მართლმსაჯულების დეფექტები, რომელიც დღეს არსებობს", - განუცხადა „ჯი-ეიჩ-ენს" ქეთი ბექაურმა.
რაც შეეხება უშუალოდ პროცესს, ადვოკატის განმარტებით, სასამართლომ დაცვის მხარის მიერ დაყენებული არც ერთი შუამდგომლობა არ დააკმაყოფილა.
„ჩვენ დავაყენეთ სასამართლო პალატის მოსამართლის, გიორგი ჩემიას აცილების საკითხი, რომელიც საზოგადოებამ სანდრო გირგვლიანის საქმით გაიცნო, ასევე მოვითხოვეთ სასამართლოს თავმჯდომარის მზია ლომთათიძისა და პროკურორის აცილება, თუმცა ყველა ჩვენი შუამდგომლობა იგნორირებულ იქნა", - აღნიშნა ადვოკატმა.
პრეზიდენტის პირველი ვაჟის მორიგი სასამართლო პროცესი 25 მაისს, 11:30 საათზე ჩაინიშნა.
შეგახსენებთ, რომ გამსახურდია 2009 წლის 27 ოქტომბერს, განზრახ მკვლელობის მცდელობის და იარაღის უკანონო შეძენა-შენახვა-ტარებისთვის დააკავეს. მოგვიანებით მას კიდევ ერთი ბრალდება - პატიმართა და მსჯავრდებულთა სამკურნალო დაწესებულების ერთ-ერთი კონტროლიორისთვის ქრთამის მიცემა დაემატა. მას თბილისის საქალაქო სასამართლომ თავისუფლების 9 წლითა და 6 თვით აღკვეთა მიუსაჯა.
