პარლამენტის წინ საშიმშილოდ შეკრებილ ადვოკატებს პოლიტიკური პარტიებისა და საზოგადოების წარმომადგენლები უერთდებიან.
დღეს დილიდან ადვოკატებს სოლიდარობა გამოუცხადა "დევნილთა სამოქალაქო მოძრაობამ". როგორც ამავე მოძრაობის თანათავმჯდომარემ დიმიტრი ომანაძემ "ჯი-ეიჩ-ენთან" საუბარში აღნიშნა, ქვეყანაში უსამართლობა მხოლოდ მიხეილ სააკაშვილის ხელისუფლებაში მოსვლით არ დაწყებულა.
"ჩვენ უსამართლო დროში ვცხოვრობთ. უპრეცენდენტოა, როცა ადვოკატთა აქციას პირამოკერილი ადამიანი უერთდება. თუმცა უსამართლობა მიხეილ სააკაშვილის ხელისუფლებაში მოსვლით არ დაწყებულა, არამედ 1992 წლიდან გრძელდება. ზვიად გამსახურდიას ხელისუფლების დამხობის შემდეგ ქვეყანაში ანარქიამ დაისადგურა. დღეს ვსაუბრობთ სანდროს, ბუტას და სხვა უდანაშაულოდ ჩახოცილი ბიჭების შესახებ, მაგრამ გვავიწყდება, რომ 1992 წლიდან მოყოლებული, შევარდნაძის ხელისუფლებამ არაერთი უდანაშაულო ბიჭი ჩახოცა",_აღნიშნა დიმიტრი ომანაძემ.
ამასთან, დიმიტრი ომანაძე სამწუხარო ფაქტად მიიჩნევს, რომ ადვოკატების შიმშილობას საზოგადოების მხრიდან აქტიური რეაქცია არ აქვს.
"პარლამენტის წინ არაერთი ადამიანი უნდა მოდიოდეს და სოლიდარობას უცხადებდეს ადვოკატებს,"_აცხადებს ომანაძე.
შეგახსენებთ, გუშინ პარლამენტის წინ ადვოკატთა ნაწილმა შიმშილობის დაწყების შესახებ გამოაცხადა. ადოკატები ქვეყანაში სამართლიანობის აღდგენას მოითხოვენ.
