17:00 საათზე თბილისის სახელმწიფო უნივერსიტეტის წარმომადგენლები კიოლნის, შპაიერის და იენის უნივერსიტეტებთან განხორციელებულ ერთობლივ სამაგისტრო პროგრამებს წარადგენენ.

კიოლნის უნივერსიტეტის აღმოსავლეთ სამართლის ინსტიტუტისა და თსუ იურიდიული ფაკულტეტის თანამშრომლობის ფარგლებში თსუ იურიდიული ფაკულტეტის კურსდამთავრებულთათვის მესამე წელია წარმატებით ხორციელდება ორი უმაღლესი სასწავლებლის ერთობლივ სამაგისტრო პროგრამა. პროგრამის ფარგლებში სტუდენტებს ეძლევათ საშუალება ისწავლონ კიოლნის უნივერსიტეტის სასწავლო პროგრამით და მიიღონ კიოლნის უნივერსიტეტის სამართლის მაგისტრის ხარისხი (LL.M.).

შპაიერის ადმინისტრაციულ მეცნიერებათა უნივერსიტეტთან თანამშრომლობის საფუძველზე თსუ-ში 2009 წლის დეკემბრის თვიდან მოქმედებს ერთობლივი სამაგისტრო პროგრამა „საჯარო მმართველობა". პროგრამის ფარგლებში საჯარო სამსახურში დასაქმებულთა გადამზადებაც ხორციელდება.

2011 წლის შემოდგომის სემესტრიდან თსუ ეკონომიკისა და ბიზნესის ფაკულტეტსა და ფრიდრიჰ-შილერის სახელობის იენის უნივერსიტეტს შორის თანამშრომლობის ფარგლებში ამოქმედდება ერთობლივი სამაგისტრო პროგრამა „საერთაშორისო საწარმოთა მართვა" („Managing International Enterprises"). პროგრამის მიზანია ბიზნესის ადმინისტრირების სფეროში სამეცნიერო კვლევისა და შემოქმედებითი მუშაობის უნარების მქონე ევროპული და მსოფლიო დონის კონკურენტუნარიანი სპეციალისტების მომზადება.

„გერმანიის დღეების" საზეიმო ღონისძიებების ფარგლებში 20 მაისს მოსწავლე-ახალგაზრდობის სასახლის სარკეებიან დარბაზში განათლების სფეროში გერმანიისა და საქართველოს თანამშრომლობის ამსახველი მასალების გამოფენა მოეწყობა. დაგეგმილია ღია კარის დღის გამართვაც, სადაც კიოლნის, იენისა და შპაიერის უნივერსიტეტებთან თსუ-ს ერთობლივი სამაგისტრო პროგრამების პრეზენტაცია ჩატარდება. პრეზენტაციის დასასრულს გაიმართება თსუ-ს გერმანული ფილოლოგიის სტუდენტთა მოკლე თეატრალური წარმოდგენა „Deutschland alt kalt Wald", რომლის რეჟისორიც ბოშის ფონდის ლექტორი კასიან ონეზორგეა.
გერმანული დღეები საქართველოში 21 მაისს დასრულდება.