ოპოზიციონერი დეპუტატი ჯონდი ბაღათურია ხელისუფლებასა და ოპოზიციის წარმომადგენლებს ქვეყნის ინტერესების იგნორირებაში და სეპარატისტული მოლაპარაკებების დაწყებაში ადანაშაულებს.
როგორც პლენარულ სხდომაზე "ქართული დასის" ლიდერმა განაცხადა, ხელისუფლებას ქვეყნისთვის ძალიან მტკივნეულ საკითხზე შეცდომა მოუვიდა და კრახით დაასრულა საარჩევნო გარემოს გაუმჯობესებაზე მოლაპარაკებები.
"ამ საარჩევნო კოდექსით, სადაც წერია, რომ აუცილებლად უნდა გაიმარჯვოს "ნაციონალურმა მოძრაობამ", ფიქრობთ, არჩევნებზე გავალთ და ჩავატარებთ სამართლიან არჩევნებს? სამარცხვინოა და ეს ჩემს კოლეგებსაც ეხება, რაღაც გაერთიანება რომ აქვთ გაკეთებული. რა არის ეს ინდივიდუალურად მოგელაპარაკები, ცალ-ცალკე გადაბირებისა და შეთანხმების მეთოდი?!" - მიმართა ბაღათურიამ უმრავლესობასა და ოპოზიციას.
მისი შეფასებით, მიუღებელია ცალ-ცალკე მოლაპარაკებები საარჩევნო კოდექსის მიღება, ამიტომ ბაღათურიამ პოლიტიკურ სუბიექტებს მოუწოდა, ერთობლივად დასხდნენ, რათა ქვეყანაში შეიქმნას თავისუფალი და სამართლიანი არჩევნების გარემო.