ბიზნესომბუდსმენი ბიზნესის პრობლემების მოსმენას განაგრძობს, ხოლო ბიზნესი საგადასახადო კოდექსში ცვლილებების მოთხოვნას.
სხვადასხვა ბიზნესგაერთიანების წარმომადგენლებს დღეს ბიზნესომუდსმენი შეხვდა და მათ წინაშე არსებული პრობლემები კიდევ ერთხელ მოისმინა.
გიორგი პერტაია ამბობს, რომ ზოგიერთი პრობლემა უკვე გადაჭრილია და ახლა აინტერესებს, რამდენად კმაყოფილია კერძო სექტორი და კიდევ რა უნდა გაკეთდეს ბიზნესის განვითარებისთვის.
"ზოგიერთი პრობლემა, რომელიც შემოსავლების სამსახურში იყო წარდგენილი, გადაწყდა, ხოლო ნაწილზე მუშაობა მიმდინარეობს. გვაინტერესებს ბიზნესის აზრი, არიან თუ არა კმაყოფილნი და კიდევ რა პრობლემებია გადასაწყვეტი: საუბარია საწარმოო დანაკარგებზე, ქრონომეტრაჟზე, რომელიც ბევრ სასტუმრო ბიზნესს აწუხებდა და აწუხებს კიდეც. ასევე განვიხილავთ შემოსავლების სამსახურის ახალ ინიციატივას, რაც აუდიტორული კომპანიების მიერ საგადასახადო შემოწმების ჩატარებას ეხება", - განაცხადა ბიზნესომბუდსმენმა.
ბანკების ასოციაციის პრეზიდენტი კი ამბობს, რომ პრობლემების მოგვარება საგადასახადო კოდექსის ზოგიერთი მუხლის რევიზიით და მათი დახვეწით შეიძლება.
"ვმუშაობთ როგორც ბიზნესომბუდსმენთან, ასევე სხვადასხვა უწყებასთან, რათა შეჯერდეს და გადაწყდეს ყველა ის პრობლემა რომელიც გვაწუხებს. საუბარი არ არის რომელიმე კონკრეტული პრობლემის გადაჭრაზე ან მოგვარებაზე, აქ საუბარია იმაზე, რომ ახალი საგადასახადო კოდექსის რამდენიმე მუხლი არის დასახვეწი", - აღნიშნა საბანკო ასოციაციის პრეზიდენტმა ზურაბ გვასალიამ.
