დღეს, 19:00 საათზე ფოთში ახალი სასტუმრო „პორტო" გაიხსნება.
თანამედროვე ტიპის, კეთილმოწყობილი სასტუმრო ქალაქის ცენტრში, აკაკის N 63-ში მდებარეობს. „პორტოს" მშენებლობა 1 წლის განმავლობაში მიმდინარეობდა და მენეჯმენტმა დაახლოებით 350 000 დოლარის ინვესტიცია ჩადო. „პორტო" ყველა თანამედროვე სტანდარტს აკმაყოფილებს და სტუმრებს ხელმისაწვდომი ფასებით მოემსახურება.
სასტუმროში ნომრის ღირებულება 80 ლარიდან იწყება, მაქსიმალური ფასი კი 140 ლარია. სტუმრებს სამჯერადი კვებით და 24 საათიანი ბარით სარგებლობაც შეეძლებათ.
სასტუმროს დირექტორის გიორგი თაბუკაშვილის განცხადებით, სასტუმრო იმ ქართველ და უცხოელ სტუმრებზეა გათვლილი, რომლებიც ფოთში საქმიანი ვიზიტით ხშირად ჩადიან.
„ფოთში ხარისხიანი სასტუმროების ნაკლებობაა, ამიტომ ქალაქის სტუმრებს ხშირად აჭარაში უწევდათ წასვლა. ქალაქში ძალიან ბევრი სტუმარი ჩამოდის და მოთხოვნა თანამედროვე სასტუმროებზე საკმაოდ მაღალია, ამიტომ „პორტოს" სავარაუდოდ მომხმარებლების ნაკლებობა არ ექნება",- აცხადებს თაბუკაშვილი.
უახლეს მომავალში სასტუმროს გვერდით მეორე, 48 ნომრიანი კომპლექსის მშენებლობაც დაიწყება, რომლის დასრულებასაც მენეჯმენტი მომავალ წელს გეგმავს.
სასტუმროს გახსნას დღეს ფოთის მერი ვახტანგ ლემონჯავა, ადგილობრივი თვითმმართველობის წევრები, ფოთის პორტის, „რაკია საქართველოს" და ფოთის ადგილობრივი ბიზნეს კომპანიების ხელმძღვანელი პირები დაესწრებიან.