სახაზინო (საბიუჯეტო) დაწესებულების თანამშრომელთა მიერ პირადობის ელექტრონული მოწმობის აღების ვალდებულების თანმიმდევრობასა და ვადებს მთავრობა გაწერს. აღნიშნულთან დაკავშირებით ცვლილება შედის "საქართველოს მოქალაქეთა და საქართველოში მცხოვრებ უცხოელთა რეგისტრაციის, პირადობის (ბინადრობის) მოწმობისა და საქართველოს მოქალაქის პასპორტის გაცემის წესის შესახებ" კანონში.
კანონპროექტში ნათქვამია, რომ კანონის ამოქმედებიდან არა უგვიანეს 3 თვის ვადაში საქართველოს მთავრობამ გამოსცეს დადგენილება, რომლითაც განისაზღვრება საჯარო მოსამსახურეების, საქართველოს საერთო სასამართლოების, საქართველოს საკონსტიტუციო სასამართლოს, საჯარო სამართლის იურიდიული პირების და სხვა სახაზინო (საბიუჯეტო) დაწესებულების თანამშრომელთა მიერ პირადობის ელექტრონული მოწმობის აღების ვალდებულების თანმიმდევრობა და ვადები.
გარდა ამისა, საქართველოს იუსტიციის მინისტრმა არა უგვიანეს 2011 წლის 1-ლი ივლისისა უზრუნველყოს ამ კანონით გათვალისწინებული ნორმატიული აქტების გამოცემა.
პირადობის (ბინადრობის) ელექტრონული მოწმობა ორენოვანი - ქართულ- და ინგლისურენოვანი იქნება.