თბილისში გერმანული დღეები გაიხსნა. ღონისძიების პრეზენტაცია დედაქალაქის საკრებულოში გაიმართა. იგი თბილისის საკრებულოს თავმჯდომარემ ზაალ სამადაშვილმა და გერამანიის ფედერაციული რესპუბლიკის ელჩმა ორთვინ ჰენიგმა გახსნეს.
სამადაშვილმა ქართულ-გერმანულ ურთიერთობებზე ისაუბრა და აღნიშნა, რომ არა მხოლოდ თბილისს, არამედ მთელს ქვეყანას დღემდე ძალიან საინტერესო, ღრმა და სასარგებლო გერმანული კვალი ატყვია.
"ჩვენი ქალაქის იერსახის ჩამოყალიბებაში გერმანელ არქიტექტორებს დიდი წვლილი მიუძღვით. საკრებულოს შენობის იერსახე არაჩვეულებრივი გერმანელი არქიტექტორის პაულ შტერნის მიერ არის შექმნილი. მე-19 საუკუნიდან მოყოლებული, თბილისში არსებობდა ე.წ. გერმანული კოლონია, სადაც დაახლოებით, სამიდან ხუთი ათასამდე გერმანელი ცხოვრობდა. აქ მოღვაწეობდნენ არა მხოლოდ არქიტექტორები და ლიტერატორები, არამედ მეწარმეები _ ძმები სიმენსები",_აღნიშნა სამადაშვილმა.
მისი თქმით, სწორედ ეს ადამიანები ქმნიდნენ თბილისს, მის საზოგადოებრივ, კულტურულ და სამეწარმეო ცხოვრებას.
"ჩვენ მადლიერი ხალხი ვართ და არასოდეს დაგვავიწყდება ის თანადგომა, რომელსაც გერმანელი ხალხი და გერმანული სახელმწიფო გამოხატავდა საქართველოს მიმართ. მადლიერნი ვართ იმ სახელმწიფო მოღვაწეების, რომლებიც მხარში უდგანან საქართველოს და იცავენ მის ინტერესებს",_განაცხადა ზაალ სამადაშვილმა.
გერმანიის ელჩმა დღეს ვიდეორგოლი წარადგინა, სადაც გერმანიის მოქალაქეები საქართველოს განვითარების, კულტურისა და ადათ-წესების შესახებ საუბრობენ. ორთვინ ჰენიგმა ამ ვიდეორგოლს ხუმრობით "საქართველოსთვის სიყვარულის ახსნაც'' კი უწოდა.
დღესვე გერმანიის ელჩმა კვირეულის გეგმებზე ისაუბრა.
"კვირეულის ფარგლებში ჩვენ გერმანულ ნაკვალევზე ვიმოგზაურებთ. ეს ღონისძიება მხოლოდ თბილისს მიეძღვნება, რადგან მე-19-მე-20 საუკუნეებში სწორედ ამ ქალაქის აღორძინებაში მიუძღვით წვლილი ჩემი ქვეყნის უნიჭიერეს არქიტექტორებს",_აღნიშნა გერმანიის ელჩმა.
სხვადასხვა ღონისძიებასთან ერთად გერმანიის დღეების ფარგლებში თბილისის პარტნიორ სკოლებს შორის დებატების კონკურსის ჩატარებაც არის დაგეგმილი. გამარჯვებულ მოსწავლეებს 18 მაისს თბილისის საკრებულოს თავმჯდომარე და გერმანიის ელჩი პირადად დააჯილდოებენ.
ცნობისთვის, გერმანიის დღეები დღეს დაიწყო და 21 მაისს დასრულდება.
