საქართველოს მოქალაქე 14 წლის ასაკის მიღწევიდან 6 თვის ვადაში ვალდებულია მიიღოს პირადობის მოწმობა. აღნიშნულთან დაკავშირებით ცვლილება შედის "საქართველოს მოქალაქეთა და საქართველოში მცხოვრებ უცხოელთა რეგისტრაციის, პირადობის (ბინადრობის) მოწმობისა და საქართველოს მოქალაქის პასპორტის გაცემის წესის შესახებ" კანონში.
დღეს არსებული რეგულაციით, საცხოვრებელი ადგილის მიხედვით რეგისტრაციის გავლა და პირადობის (ბინადრობის) მოწმობის აღება სურვილისამებრ შეუძლია ასევე 14 წლამდე საქართველოს მოქალაქეს და საქართველოში მცხოვრებ უცხოელს.
კანონპროექტის თანახმად, პირადობისა და ბინადრობის მოწმობების ერთმანეთისგან გამიჯვნა ხდება და 14 ასაკი საქართველოს მოქალაქეს პირადობის მოწმობის ვალდებულება ემატება, კერძოდ, აღნიშნული მუხლი საკანონმდებლო ინიციატივაში შემდეგნაირად ჩამოყალიბდა: საქართველოს მოქალაქე 14 წლის ასაკის მიღწევიდან 6 თვის ვადაში ვალდებულია მიიღოს პირადობის მოწმობა. პირადობის მოწმობის აღება სურვილისამებრ შეუძლია ასევე 14 წლამდე ასაკის საქართველოს მოქალაქეს.
გარდა ამისა, მოქმედი კანონმდებლობით, საქართველოს მოქალაქე და საქართველოში მცხოვრები უცხოელი 14 წლის ასაკის მიღწევიდან არა უგვიანეს 6 თვისა ვალდებული არიან გაიარონ რეგისტრაცია საცხოვრებელი ადგილის მიხედვით, ხოლო თუ მათ რამდენიმე საცხოვრებელი ადგილი აქვთ - ერთ-ერთი საცხოვრებელი ადგილის მიხედვით, და მიიღონ პირადობის (ბინადრობის) მოწმობა. 14 წლის ასაკს მიღწეული პირის რეგისტრაცია საცხოვრებელი ადგილის მიხედვით და პირადობის (ბინადრობის) მოწმობის გაცემა ხორციელდება ამ პირის ან მისი კანონიერი წარმომადგენლის განცხადების საფუძველზე.
პარლამენტში შესულ საკანონმდებლო ინიციატივაში კი მოხსნილია ასაკობრივი ზღავარი, კერძოდ, საქართველოს მოქალაქე და საქართველოში მცხოვრები უცხოელი ვალდებულნი არიან გაიარონ რეგისტრაცია საცხოვრებელი ადგილის მიხედვით, ხოლო თუ მათ რამდენიმე საცხოვრებელი ადგილი აქვთ - ერთ-ერთი საცხოვრებელი ადგილის მიხედვით. 14-იდან 18 წლამდე ასაკის პირის რეგისტრაცია საცხოვრებელი ადგილის მიხედვით, ასევე პირადობის (ბინადრობის) მოწმობის გაცემა ხორციელდება ამ პირის ან მისი კანონიერი წარმომადგენლის განცხადების საფუძველზე.
