ერთადერთი ქვეყნა, რომელიც საქართველოს საფრთხეს უქმნის ეს არის აგრესორი და ოკუპანტი ქვეყანა. ამის შესახებ დღეს, ჟურნალისტებს საპარლამენტო უმრავლესობის ერთ-ერთმა ლიდერმა გოკა გაბაშვილმა აშშ-ს საელჩოსთან "ქართული პარტიის" მიერ გამართული აქციის შეფასებისას განუცხადა.
"ამერიკა წლების განმავლობაში მთავარი პარტნიორია საქართველოს, ეს არის პოლიტიკური მხარდაჭერა, ტერიტორიული მთლიანობის და ეკონომიკური მხარდაჭერა", - აღნიშნა გაბაშვილმა.
მისივე თქმით, აშშ-სა და საქართველოს შორის ყველა მიმართულებით თანამშრომლობა ჯერ კიდევ 2009 წელს სტრატეგიული პარტნიორობის ქარტიით გაფორმდა.
"დარწმუნებული ვარ ეს მხარდაჭერა მომავალშიც გაგრძელდება, მათ შორის თავისუფალი, დემოკრატიული განვითარების კუთხითაც. რაც შეეხება საფრთხეს ერთადერთი ქვეყანა, რომელიც საფრთხეს უქმნის საქართველოს არის ოკუპანტი და აგრესორი ქვეყანა", - აღნიშნა გაბაშვილმა.
შეგახსენებთ, რომ აშშ-ს საელჩოსთან "ქართული პარტიის" აქცია მიმდინარეობს. პარტიის ლიდერები შეერთებულ შტატებს სააკაშვილის ხელისუფლების მხარდაჭერაში და ქართველი ხალხის "თავისუფლების შეზღუდვაში" ადანაშაულებენ.
