საპარლამენტო უმცირესობის შეფასებით, "ქართული პარტიის" პოზიცია საქართველოს ნაციონალურ ინტერესებს არ ემთხვევა. ამის შესახებ "ქრისტიან-დემოკრატების" წევრმა, ვიცე-სპიკერმა ლევან ვეფხვაძე ჟურნალისტებს "ქართული პარტიის" აშშ-ს საელჩოსთან მიმდინარე აქციის შეფასებისას განუცხადა.
"ყველას შეუძლია შეიკრიბოს ქუჩაში და გამოხატოს საკუთარი პოზიცია, მაგრამ ეს პოზიცია ამჯერად არ ემთხვევა ქვეყნის ნაციონალურ ინტერესებს. ჩვენ ვიცით, რომ არის ოკუპანტი ძალა, რომელთანაც ერთი-ერთზე დარჩენა ჩვენთვის არის ძალიან საშიში", - აღნიშნა ვეფხვაძემ.
დეპუტატის შეფასებით, იმ შემთხვევაში თუ საქართველო პარტნიორებთან ურთიერთობას გაწყვეტს და დაუპირისპირდება იმ ქვეყნებს, სადაც დემოკრატია უმთავრესი ღირებულებაა, ამით ქვეყნა შესაძლოა აღმოიჩნდეს მძიმე და გამოუსწორებელ ვითარებაში.
შეგახსენებთ, რომ აშშ-ს საელჩოსთან "ქართული პარტიის" აქცია მიმდინარეობს. პარტიის ლიდერები შეერთებულ შტატებს სააკაშვილის ხელისუფლების მხარდაჭერაში და ქართველი ხალხის "თავისუფლების შეზღუდვაში" ადანაშაულებენ.
