"ქრისტიან-დემოკრატები" ბიზნესმენი ბიძინა ივანიშვილის მიერ 2012 წლის საპარლამენტო არჩევნებში რომელიმე პოლიტიკური ძალის უკან დადგომას არ გამორიცხავენ. ამის შესახებ "ქრისტიან-დემოკრატების" წევრმა, პარლამენტის ვიცე-სპიკერმა ლევან ვეფხვაძემ "ქართუ ჯგუფის" მიერ გავრცელებული განცხადების შეფასებისას აღნიშნა.
"2012 წლის საპარლამენტო არჩევნები თავისი არსით არის უკვე საპრეზიდენტო არჩევნების ტოლფას. თუკი აქამდე აღმასრულებელ ხელისუფლებას განსაზღვრავდა პრეზიდენტი და პარლამენტი შედარებით მეორე ხარისხოვანი იყო, 2012 წლის საპარლამენტო არჩევნებით კი პრაქტიკულად ჩვენ ვირჩევთ ქვეყნის მმართველს", - აღნიშნა ვეფხვაძემ.
დეპუტატის შეფასებით, 2012 წელი ის პერიოდია, როდესაც განსაკუთრებულად ხშირი იქნება სხვადასხვა დაჯგუფებების და ახალ-ახალი პირების გამოჩენა პოლიტიკურ ასპარეზე.
"რამდენად იქნება თავად ბიძინა ივანიშვილი არ ვიცი. ცოტა სკეპტიკურად უყურებ მისი მხრიდან გასაჯაროების სურვილს, რადგან ივანიშვილს ეს სურვილი არასდროს არ ჰქონია, თუმცა არ გამოვრიცხავ, რომ რომელიმე პოლიტიკური ძალის უკან დადგეს", - აღნიშნა ოპოზიციონერმა დეპუტატმა.
შეგახსენებთ, რომ "ქართუ ჯგუფის" პრესსამსახური "ლეიბორისტულ პარტიის" საპასუხოდ, რომლებიც ბიზნესმენ ბიძინა ივანიშვილს პრეზიდენტ სააკაშვილის ფინასურ დახმარებაში სდებენ ბრალს განცხადება გაავრცელა.
"სწორედ ახლანდელ ხელისუფლებას არ აძლევს ხელს არსებული ბალანსის დარღვევა, განსაკუთრებულ სიფრთხილეს იჩენს არჩევნების მოახლოებასთან დაკავშირებით, რომ ბიძინა ივანიშვილმა ვინმე არ დააფინანსოს და რომელიმე პოლიტიკურ ძალას მხარში არ ამოუდგეს იგი. სწორედ ამიტომაც, თუკი ნათელაშვილის ადრინდელ განცხადებებს ბეჭდური მედია და მეორე ხარისხოვანის ტელეარხები აშუქებდნენ ხოლმე; ამჯერად მისი ბრიფინგის შესახებ სიუჟეტი ხელისუფლების მიერ კონტროლირებადმა ყველა არხმა _ რუსთავი2-მა, იმედმა და საზოგადოებრივმა მაუწყებელმა დღის განმავლობაში რამდენჯერმე გადასცა. სწორედ სააკაშვილის მთავრობა ცდილობს, დაიხმაროს ქართველი ხალხი და ასევე დაარწმუნოს რუსეთის მთავრობაც, რათა მოიშოროს ივანიშვილი და მისგან თეორიულად მოსალოდნელი შესაძლო ხიფათი თავიდან აიცილოს", - ნათქვამია განცხადებაში.
