"ქართული პარტიის" პოლიტიკური მდივანი ეროსი კიწმარიშვილი აშშ-ს საელჩოსთან დაგეგმილი აქციის წინ კიდევ ერთხელ განმარტავს, რომ „ქართული პარტია" ამერიკის მიერ საქართველოს დღევანდელი მმართველი რეჟიმის მხარდაჭერას აპროტესტებს. ყველა იმ პოლიტიკოსს და ექსპერტს, რომლებიც ისეთ სურათს ხატავენ, თითქოს, „ქართული პარტიის" ამ ქმედებებით ქვეყანა იქცევა, ეროსი კიწმარიშვილი თავად ამერიკის ელჩის ჯონ ბასის განცხადებას შეახსენებს, რომელმაც აღნიშნა, რომ თავისუფალ ქვეყანაში ნებისმიერ პოლიტიკოსს, არაპოლიტიკოსს თუ კერძო პირს აქვს თავისი პოზიციის გამოხატვის უფლება.
„ქართული პარტიის" პოლიტიკური მდივანი კატეგორიულად მოითხოვს, რომ ვალერი კვარაცხელიამ და მისმა მსგავსმა სხვა მარგინალმა პოლიტიკოსებმა აქციაში მონაწილეობა არ მიიღონ.
ეროსი კიწმარიშვილი ასევე კატეგორიულად აფრთხილებს სააკაშვილს, რომ მან და მისმა სამსახურებმა ფიქრადაც არ გაივლონ ამერიკის საელჩოს წინ რაიმე სახის პროვოკაციის მოწყობა, იქნება ეს ამერიკის დროშის დაწვა თუ სხვა არანორმალური ქმედება.
„თუ ასეთი რამ მოხდება, ეს იქნება ხელისუფლების მიერ პროვოცირებული და „ქართული პარტია" მთლიანად ემიჯნება მას", - აღნიშნა ეროსი კიწმარიშვილმა. იგი შეახსენებს საზოგადოებას, რომ დღევანდელ რეჟიმს მსგავსი პროვოკაციების მოწყობის დიდი გამოცდილება აქვს და ამის ერთ-ერთ მაგალითად საპარლამენტო არჩევნების წინ გალის რაიონში მოწყობილ პროვოკაციას ასახელებს.
„თავი დაანებეთ ისტერიას და საზოგადოების შეცდომაში შეყვანის მცდელობებს. ეს აქცია სწორედ ქართველი საზოგადოების და გადასახადების ამერიკელი გადამხდელების გამოფხიზლებას ემსახურება. ამერიკელებმა უნდა იცოდნენ, რას ფიქრობს მათზე ქართული საზოგადოება", - აცხადებს ეროსი კიწმარიშვილი.
