საგარეო საქმეთა სამინისტროს აზერბაიჯანში საქართველოს ელჩის თემურ შარაშენიძის კეთილსინდისიერებაში ეჭვი არ შეაქვს და მის გამოწვევას არ აპირებს. ასე ეხმაურება საგარეო უწყება საინგილოში მაცხოვრებელი ეთნიკური ქართველების მოთხოვნას, აზერბაიჯანიდან საქართველოს ელჩის გაწვევის შესახებ.
„მედიით გავრცელებულ ინფორმაციასთან დაკავშირებით ჩვენ გარკვეული ეჭვი გაგვაჩნია. ვფიქრობთ, თემურ შარაშენიძის მხრიდან ასეთ ინციდენტს ადგილი არ ექნებოდა. აქედან გამომდინარე, სანამ მოკვლევა არ დასრულდება, ჩვენ გავრცელებულ ინფორმაციაზე არა თუ არანაირ რეაგირებას არ მოვახდენთ, არამედ ჩვენი ელჩის კეთილსინდისიერებაში ეჭვიც არ შეგვაქვს", - განუცხადა ჟურნალისტებს საქართველოს საგარეო საქმეთა მინისტრის მოადგილე ნინო კალანდაძემ.
შეგახსენებთ, რომ საინგილოში მცხოვრები ეთნიკური ქართველები აზერბაიჯანიდან საქართველოს ელჩის გაწვევას მოითხოვენ. როგორც ეთნიკური ქართველები აცხადებენ, თემურ შარაშენიძემ მათ სიტყვიერი შეურაცხყოფა მიაყენა.
