"ქართული პარტია" ხელისუფლებას მოუწოდებს პოლიტიკური ოპონენტების მიმართ ძალადობა შეწყვიტოს. ამის შესახებ დღეს, "ქართული პარტიის" თავმჯდომარემ სოზარ სუბარმა გამართულ პრესკონფერენციაზე განაცხადა და აღნიშნა, რომ ხელისუფლება ცდილობს "ქართული პარტიის" საპროტესტო აქციებს ძალადობით და პროვოკაციებით უპასუხოს.
სუბარის თქმით, 14 მაისის ქუთაისის სამხარეო პოლიციის სამმართველოს ვანისა და სამტრედიის პოლიციის განყოფილებების, ასევე სოდ-ის თანამშრომლებმა სამტრედიის რაიონის სოფელ დაფნარის მახლობლად ერთ-ერთი ავტობუსი გააჩერეს, რომლითაც ბათუმში გამართული აქციიდან "ქართული პარტიის" მხარდამჭერები თბილისში ბრუნდებოდნენ.
პარტიის თავმჯდომარის თქმით, სამართალდამცველბა მიზეზად ავტობუსს ტექნიკური დათვალიერების გაუვლელობა დაასახელეს და შეეცადნენ საჯარიმო სადგომზე გადაეყვანათ, ხოლო მგზავრებს შუაღამისას უკაცრიელ, დაუსახლებელ ადგილზე ტოვებდნენ.
"ადგილზე მისვლისას მე და ეროსი კიწმარიშვილი დავემუქრეთ, რომ ამგვარი მოქმედების შემთხვევაში ავტომაგისტრალს გადავკეტავდით, თუმცა გაფრთხილებამ შედეგი არ გამოიღო, რის შემდეგაც პარტიის მხარდამჭერებმა ავტომაგისტრალი გადაკეტეს. სატელეფონო კონსულტაციების შემდეგ მათ ავტობუსის მძღოლს საბუთები დაუბრუნეს და გზის გაგრძელების უფლება მისცეს", - განაცხადა სუბარმა და აქვე დასძინა, რომ სამართალდამცველების მხრიდან აღნიშნული ფაქტი არა კანონის დაცვას, არამედ "ქართული პარტიის" მხარდამჭერთა დაშინებას ისახავდა მიზნად.
ამასთან, სუბარი პოლიციის მიერ დაჯარიმებულ მძღოლებს დაჰპირდა, რომ საჯარიმო თანხებს "ქართული პარტია" დაფარავს.
გარდა ამისა, სოზარ სუბარის თქმით, მათი გაზეთების დაბეჭდვაზე სტამბები ხელისუფლების ზეწოლის შედეგად უარს აცხადებენ.
