15 მაისს სოხუმში დაგეგმილ აფხაზ სასულიერო და საერო პირთა ნაწილის შეკრებასთან დაკავშირებით საქართველოს საპატრიარქო სპეციალურ განცხადებას ავრცელებს.
"მასმედიის საშუალებით ცნობილი გახდა, რომ 15 მაისს სოხუმში შედგება აფხაზი სასულიერო და საერო პირების ერთი ნაწილის შეკრება. ამ შეკრების მიზეზი, როგორც ჩანს, შიდა დაპირისპირებაა",_ნათქვამია განცადებაში.
ამასთან, საპატრიარქოში განმარტავენ, რომ მათთვის მნიშვნელოვანია აფხაზეთში მიმდინარე ყველა და, მითუმეტეს, საეკლესიო პროცესები. ბუნებრივია, მტკივნეულია აფხაზ მართლმადიდებლებს შორის არსებული შიდა განხეთქილებაც.
"მივმართავთ კრების მონაწილეთ და აფხაზეთში მცხოვრებ ყველა მართლმადიდებელს, რომ დავდგეთ გარეშე ძალების მიერ ინსპირირებულ პროცესებზე მაღლა (რაც არის მიზეზი არსებული დაპირისპირებებისა) და ქრისტესმიერი სიყვარულით და მშვიდობისმყოფელობით აღვადგინოთ კანონიკური ერთობა ჩვენს შორის. ქრისტეს მისტიურ სხეულთან, რომელიც ყველაზე მაღლა დგას, კავშირი მხოლოდ ადგილობრივი ეკლესიების კანონიკურ საზღვრებშია შესაძლებელი; მის მიღმა მყოფნი კი მოწყვეტილნი არიან უფლის წიაღს და მის მაცხოვნებელ მადლს. ეს ყველამ უნდა გააცნობიეროს",_ნათქვამია საპატრიარქოს განცხადებაში.
ამასთან, საპატრიარქოს განცხადების თანახმად, საქართველოს ეკლესია ყოველთვის მზად იყო და არის, გამართოს შეხვედრები და მოლაპარაკებები თავის სამწყსოსთან, _ აფხაზეთის სასულიერო პირებთან და მრევლთან.
