ათასობით ეგვიპტელმა მასობრივ დემონსტრაციაში მიიღო მონაწილეობა, რომელიც ეროვნული ერთობის მხარდაჭერის მიზნით გაიმართა. ამის შესახებ France-Presse-ი იტყობინება.
დემონსტრაციის ლიდერებმა ეგვიპტელებს ერთიანობისკენ მოუწოდეს. ამასთან, მათ რელიგიათაშორისი დაპირისპირება დაუშვებლად მიიჩნიეს.
"თუ თქვენ თავს ესხმით ქრისტიანებს, ამით ყველა ეგვიპტელზე თავდასხმას ახორციელებთ",_ აღნიშნავდნენ აქციის მონაწილეები. ბევრ დემონსტრანტს ჯვარი ეჭირა.
ქრისტიანებთან ერთად, მომიტინგეები მხარდაჭერას უცხადებდნენ პალესტინელებსაც.
შეგახსენებთ, 7 მაისს ეგვიპტეში მომხდარ რელიგიათაშორის დაპირისპირებას 15 ადამიანი ემსხვერპლა. 7 მაისს მუსულმანებმა შეიტყვეს, რომ კაიროს ჩრილო-დასავლეთით ერთ-ერთ ქრისტიანულ ტაძარში ძალით ჩაკეტეს ქალი, რომელიც ისლამის მიღებას აპირებდა. ამის გამო მუსულმანები თავს დაესხნენ ეკლესიას. სიტუაციის განმუხტვის მიზნით საქმეში პოლიციელები და სამხედროები ჩაერთნენ. მოგვიანებით ხელისუფლებამ 200 ადამიანი დააკავა. ამასთან, გისოსებს მიღმა აღმოჩნდა ქალიც, რომლის გამოც შეტაკება მოხდა.
მას უღირსი საქციელის გამო ადანაშაულებდნენ. კერძოდ, ქალს ორი ქმარი ჰყავდა: მუსულმანი და კოპტი ქრისტიანი.
ცნობისთვის, ეგვიპტელი ქრისტიანები_კოპტები ქვეყნის მოსახლეობის 8-9 %-ს შედგენენ. ქრისტიანობის კოპტური განშტოება დედამიწაზე უძველესად მიიჩნევა. ფიქრობენ, რომ ეგვიპტის ტერიტორიაზე ქრისტიანობა პირველ საკუნეში მოციქულმა მარკოზმა გაავრცელა.