ივანე ჯავახიშვილის სახელობის თბილისის სახელმწიფო უნივერსიტეტის სტუდენტური თვითმმართველობის განათლებისა და მეცნიერების დეპარტამენტმა პროექტი "ევროკავშირის დღეები" განახორციელა. პროექი 7 მაისს გაიხსნა და 9 მაისს დასრულდა.
მრავალპროფილიანმა პროექტმა ლექცია-დებატები, კონფერენცია და ინტელექტუალური თამაშები მოიცვა. პროექტის მიზანია სტუდენტების მაქსიმალური ჩართულობა საგანმანათლებლო აქტივობებში, ამასთან, საქართველო-ევროკავშირის ურთიერთობასთან დაკავშირებით ცოდნის გაღრმავება და მეტი გამოცდილების მიღება.
პროექტის ფარგლებში გაიმართა კონფერენცია თემაზე - "საქართველოს ევროკავშირში ინტეგრაცია, გამოწვევები და პერსპექტივები". მონაწილეებმა ევროკავშირის სტრუქტურებში საქართველოს ინტეგრაციის პოლიტიკური, ეკონომიკური, სოციალური თუ სხვა ასპექტები განიხილეს. კონფერენციაში გამარჯვებულმა 3 სტუდენტმა საკუთარი თემა კონფერენციის საზეიმო დახურვაზე წარმოადგინა. საუკეთესო სამეულს ფულადი პრიზები გადაეცა.
ღონისძიების ფარგლებში ინტელექტუალური თამაში "Eugame" ჩატარდა, რომლის ყველა მონაწილე ევროკავშირის სადამკვირვებლო მისიის მიერ გადმოცემული სპეციალური პრიზებით დასაჩუქრდა, ხოლო გამარჯვებულმა გუნდმა წიგნების 400-ლარიანი ვაუჩერი მიიღო.
