კალიფორნიის შტატის ყოფილი გუბერნატორი არნოლდ შვარცნეგერი და მისი მეუღლე მარია შრაივერი ერთმანეთს დაშორდნენ. ამის შესახებ თავად წყვილმა განაცხადა.
განცხადებაში, რომელიც ოჯახის წარმომადგენელმა გაავრცელა, ნათქვამია, რომ შვარცნეგერმა და შრაივერმა საკუთარი ნაბიჯი კარგად აწონეს.
"ეს გადაწყვეტილება ხანგრძლივი ფიქრისა და განსჯის შემდეგ ერთობლივად მივიღეთ",_აღნიშნავენ მეუღლეები.
წყვილი უკვე ცალ-ცალკე ცხოვრობს. აპირებენ თუ არა ისინი ოფიციალურად გაყრას, არ კონკრეტდება. პრესისთვის გავრცელებულ განცხადებაში კი ნათქვამია, რომ მეუღლეები შვილების გაზრდას ერთობლივად აპირებენ. მათ 14იდან 21 წლამდე ოთხი შვილი ჰყავთ.
შვარცნეგერმა და მისმა მეუღლემ მოუწოდეს ჟურნალისტებს, მომხდარს გაგებით შეხვდნენ და ზედმეტი დაკითხვებისგან თავი შეიკავონ.
"ეს ჩვენი პირადი საქმეა და არც ჩვენ, არც ჩვენი ახლობლები ამაზე კომენტარს არ გავაკეთებთ",_ნათქვამია შეტყობინებაში.
კალიფორნიის ყოფილ პირველ წყვილს გაყრის მიზეზების შესახებ არ დაუკონკრეტებია. ჟურნალისტები ვარაუდობენ, რომ მათი ურთიერთობა დიდი ხანია, ჩიხში შევიდა და ერთადერთ გამოსავლად გაყრა დარჩა. The Los Angeles Times-ის ცნობით, წყვილი ერთად დროს იშვიათად ატარებდა. ასე ხდებოდა იმ დროსაც, როცა შვარცნეგერი გუბერნატორი იყო და შვებულებაში ხშირად მიდიოდა.
უკანასკნელი თვეები მათ ცხოვრებაში განსაკუთრებული სირთულით ხასიათდებოდა. რვაწლიანი გუბერნატორობის შემდეგ შვარცნეგერი პირველად გადადგა და კინოში დაბრუნება გადაწყვიტა. შრაივერს კი იანვარში მამა გარდაეცვალა.
შეგახსენებთ, მარია შრაივერი 1963 წელს დაღუპული აშშ-ის პრეზიდენტ ჯონ კენედის დისშვილია. მან შვარცნეგერი 1977 წელს გაიცნო და ცხრა წლის შემდეგ მასზე დაქორწინდა.
შვარცნეგერის გუბერნატორობის დროს შრაივერი პოლიტიკური შეფასებებისგან თავს იკავებდა და ქველმოქმედებას ამჯობინებდა.
