მარტის ბოლოს განადგურებული ბოევიკების ცხედრებზე ჩატარებულმა დნმ-ის ანალიზმა ბანდფორმირების ლიდერის დოკუ უმაროვის გარდაცვალება არ დაადასტურა. ეს განცხადება დღეს ინგუშეთის მეთაურმა იუნუს-ბეკ ევკუროვმა გააკეთა.
"ექსპერტიზა ჯერ დასრულებული არ არის, მაგრამ დიდი ალბათობით შეიძლება ითქვას, რომ უმაროვის ნარჩენები იქ ნაპოვნი არ არის, იმიტომ, რომ ისინი, რომ იქ იყვნენ მათ პირველივე დღეებში აღმოაჩენდნენ. ალბათ იგი მოკლული არ არის და ჯერ ჯერობით ცოცხალია", _ განაცხადა ევკუროვმა.
მიუხედავად ამ ინფორმაციისა, ინგუშეთის მეთაური ევკუროვი დარწმუნებულია, რომ უმაროვი ადრე თუ გვიან დამსახურებულ სასჯელს მიიღებს, ვინაიდან მის მიერ ჩადენილ დანაშაულს ხანდაზმულობის ვადა არ აქვს.
"ურიგო არ იქნებოდა მას თავად, რომ გაეცნობიერებინა ყველაფერი და ჩაბარებულიყო და დამსახურებული სასჯელი მიეღო. სასჯელს მოიხდიდა და ნათელი იქნებოდა, რომ ადამიანი ინანიებს. მით უფრო, რომ მას არავითარი ავტორიტეტი არ აქვს", _ განაცხადა ინგუშეთის მეთაურმა.
შეგახსენებთ, რომ ინფორმაცია ჩრდილოკავკასიელი მებრძოლების ლიდერის დოკუ უმაროვის გარდაცვალებაზე რუსეთის ფედერაციის ძალოვანმა სტრუქტურებმა უკვე რვაჯერ გაავრცელეს, თუმცა ინფორმაცია არც ერთხელ არ დადასტურებულა.
