საქართველოს ვიცე პრემიერ-მინისტრი გიორგი ბარამიძე სამუშაო ვიზიტით ჰააგაში გაემგზავრა.
როგორც "ჯი-ეიჩ-ენს" ვიცე-პრემიერის აპარატიდან აცნობეს, ვიზიტის ფარგლებში გიორგი ბარამიძე ნიდერლანდების სამეფოს საგარეო საქმეთა და თავდაცვის მინისტრებთან, ასევე თავდაცვის სამინისტროს დაგეგმარების პოლიტიკის გენერალურ დირექტორთან, მრჩეველთა საბჭოს წევრებთან და მსოფლიოს სხვადასხვა გავლენიანი არასამთავრობო ორგანიზაციების წარმომადგენლებთან ორმხრივ შეხვედრებს გამართავს.
ბარამიძე, ასევე, ამსტერდამისა და ლეიდენის უნივერსიტეტებში ლექციებს წაიკითხავს თემებზე: ,,უსაფრთხოების გამოწვევები: საქართველოს ხედვა და პერსპექტივები" და „უსაფრთხოების გამოწვევები და საქართველოს ევროატლანტიკური ინტეგრაცია."
ვიზიტის ფარგლებში გიორგი ბარამიძე მონაწილეობას მიიღებს საქართველოს თემაზე მიძღვნილ კონფერენციაში: „დემოკრატიის არსებული გამოწვევები და პერსპექტივები" და მონაწილეებს სიტყვითაც მიმართავს.
