"ჩვენ გვინდა ქართველი აზერბაიჯანლები საქართველოში წარმატებულნი იყვნენ, ამისთვის მათ უნდა იცოდნენ თავიანთი წარმოშობის ენა_აზერბაიჯანული და, რა თქმა უნდა, ქართული, რადგან ეს არის მათი ეროვნული ენა. ჩვენ არ ვასხვავებთ ერთმანეთისაგან ქართველ-აზერბაიჯანლებს და სხვა ეროვნების წარმომადგენლებს. მათ ისევე ეკუთვნით საქართველო, როგორც დანარჩენ ქართველებს",_აღნიშნა საქართველოს პრეზიდენტმა მიხეილ სააკაშვილმა ზურაბ ჟვანიას სახელობის სახელმწიფო ადმინისტრების სკოლაში სტუმრობისას, სადაც 80 ეთნიკურად აზერბაიჯანელი ქართველი ქართული ენის კურსებს ეუფლება.
პრეზიდენტის თქმით, ქართულის დაუფლება არის იმედის მომცემიც და შთაგონების წყაროც.
ამასთან, სააკაშვილი, განათლების მინისტრთან ერთად, ქუთაისის პროფესიულ კოლეჯს ესტუმრა და კიდევ ერთი პროფესიული კოლეჯის მშენებლობას ჩაუყარა საფუძველი.
შეგახსენებთ, კოლეჯი საპრეზიდენტო პროგრამის ფარგლებში გარემონტდა. ქუთაისის პროფესიულ კოლეჯში სულ 25 ხელობას ეუფლებიან. კოლეჯში ახალგაზრდები იმ პროფესიებს ეუფლებიან, რომლებიც თანამედროვე მოთხოვნებმა განაპირობა - სარესტორნო საქმის მენეჯერი, კონდიტერი, მზარეული, მღებავი.
კოლეჯში ისწავლება ასევე ტექნიკური პროფილის სპეციალობები. კოლეჯის დასრულების შემდეგ კურსდამთავრებულები ტურისტულ და სამშენებლო სფეროში დასაქმდებიან.
კოლეჯის ტერიტორიაზე სტუდენტებისა და მასწავლებლების მონაწილეობით ახალი სახელოსნოები აშენდება. მშენებლობის საძირკველში სიმბოლური კაფსულა მიხეილ სააკაშვილმა ჩადო.
