„თავისუფალი საქართველო" და მოძრაობა "სოლიდარობა უკანონო პატიმრებს" "სახალხო კრებისა" და მოძრაობა "არას" აქტივისტების დაკავებას ხელისუფლების მხრიდან რეპრესიების ახალ ტალღად აფასებს.
"ჩვენი შეფასებით, აღნიშნული დაკავება წარმოადგენს ხელისუფლების მხრიდან რეპრესიების ახალ ტალღას. აღსანიშნავია, რომ ბოლო დროს საქართველოში ადმინისტრაციული პატიმრობა არსებითად გადაიქცა გამოხატვის თავისუფლების წინააღმდეგ მიმართულ ოფიციალურ რეპრესიის ფორმად. განსაკუთრებით უნდა აღინიშნოს საპატრულო სამსახურის ცინიზმით აღსავსე მოქმედებები, რაც სრულიად არ შეესაბამება იმ იმიჯს, რაც კარის მომღერლების მიერ კლიპებშია შექმნილი", - ნათქვამია კახა კუკავასა და ეკა ბესელიას ერთობლივ განცხადებაში.
„თავისუფალი საქართველო" და მოძრაობა "სოლიდარობა უკანონო პატიმრებს" მივმართავს საერთაშორისო საზოგადოებას, ზეწოლა მოახდინონ საქართველოს ხელისუფლებაზე, რათა "შეაჩერონ პოლიტიკური რეპრესიები, რაც ქვეყანას დესტაბილიზაციით ემუქრება".
"ვაფრთხილებთ ხელისუფლებას, შეწყვიტოს ძალადობრივი მეთოდებით საზოგადოების დაშინება, ამითი ის ვერ შეაჩერებს ჩვენი ორგანიზაციების ბრძოლას დანაშაულებრივი რეჟიმის წინააღმდეგ", - ნათქვამია განცხადებაში.
შეგახსენებთ, რომ "სახალხო კრებისა" და მოძრაობა "არას" აქტივისტები სამართალდამცველებმა რუსთავის პოლიციის ერთ-ერთი მაღალჩინოსნის, ვალერი დუღაშვილის სახლთან გამართული აქციისას დააკავეს.
