სახელმწიფო ტყის ფონდის მიწების თვითნებური დაკავებისთვის მოქალაქეები და თანამდებობის პირები ერთნაირად დაჯარიმდებიან.
აღსანიშნავია, რომ დღემდე არსებული რეგულაციით, "ადმინისტრაციულ სამართალდარღვევათა კოდექსის" დარღვევისთვის მოქალაქე და თანამდებობის პირის სხვადასხვა ოდენობის ჯარიმას იხდიდა.
ტყის სახელმწიფო საკუთრების უფლების დარღვევა სახელმწიფო ტყისა და სახელმწიფო ტყის ფონდის მიწების თვითნებური დაკავება, ტყით სარგებლობის უფლების თვითნებური დათმობა, აგრეთვე სხვა გარიგებანი, რომლებიც აშკარა თუ ფარული ფორმით არღვევენ ტყის სახელმწიფო საკუთრების უფლებას იწვევდა მოქალაქეთა დაჯარიმებას 50 ლარიდან 150 ლარამდე, ხოლო თანამდებობის პირთა - 150 ლარიდან 200 ლარამდე.
კოდექსში შესული ცვლილებების თანახმად კი აღნიშნული მუხლი ორ ნაწილად ჩამოყალიბდა და დაჯარიმების ზოგად პრინციპს ითვალისწინებს, კერძოდ კი კოდექსის 49-ე მუხლის პირველი ნაწილის თანახმად სახელმწიფო ტყის ფონდის მიწების თვითნებური დაკავება 200 ლარით დაჯარიმდება, ხოლო მეორე ნაწილის მიხედვით დაცული ტერიტორიების საზღვრების ფარგლებში მიწების თვითნებურ დაკავება გამოიწვევს 400 ლარით დაჯარიმებას.
გარდა ამისა, ცვლილებების თანახმად შემცირდა წყლის ობიექტების თვითნებური დაკავებისთვის ჯარიმა, რომლის ოდენობაც 200 ლარით განისაზღვრება.
დღემდე არსებული ნორმის თანახმად კი წყლის სახელმწიფო საკუთრების უფლების დარღვევა წყლის ობიექტის თვითნებური დაკავება, წყალსარგებლობის უფლების თვითნებური დათმობა და სხვა გარიგებანი, რომლებიც აშკარა თუ ფარული ფორმით არღვევენ წყლის სახელმწიფო საკუთრების უფლებას იწვევდა მოქალაქეთა დაჯარიმებას 100 ლარიდან 200 ლარამდე, ხოლო თანამდებობის პირთა - 300 ლარიდან 400 ლარამდე.
