საქართველოს პრეზიდენტი მიხეილ სააკაშვილი ბათუმის ბულვარში გამართულ პოლიციის აღლუმზე პოლიციელებს მიესალმა. აღლუმზე სიტყვით გამოსვლისას მიხეილ სააკაშვილმა, განაცხადა, რომ ვარდების რევოლუციის შემდეგ დაწყებული პოლიციის რეფორმა, საქართველოში განხორციელებული ყველა რეფორმის მშობელი იყო.
"ჩემო ძვირფასო თანამებრძოლებო, პატივცემულო სტუმრებო, დღეს ჩვენთვის განსაკუთრებული დღეა. მიუხედავად იმისა, რომ მზე არ გამოჩნდა ცაში, თქვენი კოლონებით გააკეთეთ აქ მზე, ბათუმის ბულვარში. თქვენი აქ ყოფნით გაათბეთ აქაურობა. საქართველოს ძალიან ბევრი ხალხი შენატრის ჩვენს გარშემო. ღვთისგან მიტოვებულ პოსტსაბჭოთა სივრცეზე თანამედროვე სახელმწიფოს მყარი საფუძვლის შექმნა თქვენი დამსახურებაა. პოლიციის რეფორმა იყო მთავარი პირველი რეფორმა რომელიც ჩვენ გავატარეთ. მშობელი ყველა სხვა რეფორმის და ჯერჯერობით სიმბოლო ჩვენი გარდაქმნის და ახალი სახელმწიფოს შექმნისთვის. განსხვავება წინა პოლიციასა და ახლანდელს შორის არაა მხოლოდ ფორმები, შეიარაღება, ან თუნდაც ხელფასი. მთავარი განსხვავება არის ის, რომ წინა პოლიცია იყო კორუმპირებული და დღევანდელი პოლიცია კი მთლიანად თავისუფალია კორუპციისგან", - განაცხადა სააკაშვილმა.
მისი თქმით, წინა პოლიცია მიიჩნევდა, რომ ხალხი იყო მისი საკუთრება.
"ხალხი იყო გამოძალვის, წამების, მისი მსახურის ობიექტი. დღევანდელი პოლიცია თვლის რომ ის ეკუთვნის ხალხს და ემსახურება ხალხს. ამიტომ ხალხი ამას პასუხობს სიყვარულით", - დასძინა პრეზიდენტმა.
