საქართველოსა და უკრაინას შორის საბორნე გადაზიდვებისას, ტურისტებისთვის ახალი მომსახურება დაინერგება.
ილიჩევსკი-ბათუმი-ილიჩევსკის მიმართულებით, მოგზაურობა სატრანსპორტო საშუალებებითაც იქნება შესაძლებელი. შესაბამისი ინფორმაცია კომპანია „უკრფერის" წარმომადგენლებმა ბათუმის საერთაშორისო გამოფენა „ექსპო ბათუმი 2011"-ის მსვლელობისას გააჟღერეს. აღნიშნულ ინიციატივას აჭარის მთავრობის თავმჯდომარე ლევან ვარშალომიძეც მიესალმება. მისი თქმით, ბათუმის პორტი საკრუიზო ლაინერების ინტენსიურ მიღებას დაიწყებს, რაც რეგიონში ტურისტების რაოდენობას კიდევ უფრო გაზრდის. ამ მხრივ კი მნიშვნელოვანი 2012 წელი იქნება.
უკრაინის გემთმფლობელების ასოციაციის წარმომადგენელთა განმარტებით, ბათუმში არის ბრწყინვალე ინფრასტრუქტურა, რომელიც შესაძლებელს ქმნის, ამ პროდუქტით უკრაინელი ტურისტებიც დაინტერესდნენ.
პროექტის ფარგლებში საუბარია ბორნის მეშვეობით ავტოტურისტების გადაყვანაზე, როგორც მსუბუქი სატრანსპორტო საშუალებებით, ასევე ავტობუსებით.