სახერხ საამქროებს სპეციალური ფირნიშების გარეშე სამასალე მორების მიღება აეკრძალებათ. აღნიშნულთან დაკავშირებით პარლამენტმა "ტყის კოდექსში" ცვლილებები დაჩქარებული წესით დაამტკიცა.
მიღებული გადაწყვეტილებით, ხე-ტყის მარკირება სპეციალური ფირნიშის საშუალებით განხორციელდება, რომელიც მორის კანონიერ წარმოშობას დაადასტურებს და ერთიან ელექტრონული მონაცემთა ბაზაში აღირიცხება.
ფირნიში გარემოს დაცვის სააგენტოსგან ლიცენზიანტები მიიღებენ, აქედან ერთი სახერხ საამქროში რჩება, ხოლო მეორე ბუნებრივი რესურსების სააგენტოში უნდა იყოს წარდგენილი.
კანონში შეტანილი ცვლილებების თანახმად, სოციალური ჭრების განხორციელების შედეგად მოპოვებული ხე-ტყის და ასევე მისგან მიღებული პირველადი გადამუშავების პროდუქტის ნებისმიერი ფორმით გასხვისება იკრძალება.