საქალაქთაშორისო რეგულარულ საავტომობილო და სამგზავრო გადაყვანის საკითხზე პარლამენტმა და მთავრობამ შეთანხმებას ვერ მიაღწია. როგორც დღეს, პარლამენტის პლენარულ სხდომაზე საკითხის განხილვისას მთავრობის საპარლამენტო მდივანმა გია ხუროშვილმა განაცხადა, რუსთავსა და თბილისისთვის საკითხის დარეგულირების უფლების მიცემა, შესაძლოა გამონაკლისად ჩაითვალოს, სხვა შემთხვევაში კი - მას შემდეგ რაც ქალაქებში მოეწყობა შესაბამისი ინფრასტრუქტურა ავტოსადგომების და გაბილეთიანების თვალსაზრისით, საკითხი სახმელეთო ტრანსპორტის სააგენტომ უნდა დაარეგულიროს.
ხუროშვილის გამოსვლას პარლამენტის პირველი ვიცე-სპიკერი მიხეილ მაჭავარიანი გამოეხმაურა და აღნიშნა, რომ მისთვის გაუგებარია, რატომ მიიჩნევს მთავრობა ცვლილებას გამონაკლისად.
"სამი თვის მანძილზე რით ვერ ჩამოყალიბდით", - მიმართა მაჭავარიანმა ხუროშვილს, რომელმაც საკითხზე დებატებისთვის მზადყოფნა განაცხადა, თუმცა ვიცე სპიკერმა მას მიკროფონი გამოურთო.
შეგახსენებთ, რომ ~საავტომობილო ტრანსპორტის შესახებ~ კანონში ცვლილებების პროექტის თანახმად, სოციალურად ურთიერთდაკავშირებულ მიმდებარე თვითმმართველ ქალაქებში, რომელთა შორის მანძილი 50 კმ-ზე ნაკლებია და როგორც წესი მგზავრთნაკადი დიდია, მგზავრთა ეფექტიანი მომსახურების მიზნით, რეგულარული საავტომობილო და სამგზავრო გადაყვანის ორგანიზება და მართვა ქალაქების ადგილობრივი თვითმართველობის ორგანოების შორის დადებული შეთანხმებების საფუძველზე გახორციელდება.
