საქართველოში აღმოსავლეთ და ცენტრალური ევროპის ინფორმაციული ტექნოლოგიების საერთაშორისო კომპანია DPA შემოვიდა
საქართველოში აღმოსავლეთ და ცენტრალური ევროპის ინფორმაციული ტექნოლოგიების საერთაშორისო კომპანია DPA შემოვიდა. როგორც ეკონომიკისა და მდრადი განვითარების სამინისტროს კომუნიკაციის, საინფორმაციო ტექნოლოგიებისა და ინოვაციის დეპარტამენტის უფროსმა ირაკლი ქაშიბაძემ განაცხადა, ეკონომიკისა და მდგრადი განვითარების სამინისტრომ საქართველოში არსებულ ბიზნეს-გარემოს, ქართული IT-ბაზრის პოტენციალსა და მიმზიდველობაზე ინფორმაცია გასულ წელს მიაწოდა. "სასიხარულოა, რომ ისეთმა გამოცდილმა კომპანიამ, როგორიც DPA-ია დადებითი გადაწყვეტილება მიიღო," - განაცხადა ქაშიბაძემ. მისივე განმარტებით, DPA-ს ქართულ ბაზარზე შემოსვლა ხელს შეუწყობს IT-სექტორის განვითარებას, ქართული ბაზრის ექსპორტზე ორიენტაციის და სპეციალისტების კონკურენტუნარიანობის ზრდას.
საერთაშორისო სავაჭრო პალატის თავმჯდომარის ფადი ასლის თქმით, პროგრესი, რომელსაც ქვეყანამ მიაღწია და ის არსებული ბიზნეს-გარემო ხელს უწყობს საქართველოში ცნობილი, საერთაშორისო კომპანიების შემოსვლას.
როგორც DPA-ს პროგრამული უზრუნველყოფის განვითარების დეპარტამენტის ხელმძღვანელმა ლაურის რიშკოვსიმ განაცხადა, DPA ლატვიაში 1998 წლიდან მუშაობს და აქვს ფილიალები ლიტვაში, ბელორუსიასა და უკრაინაში. DPA არის Microsoft-ის Gold Certified პარტნიორი შემდეგი კომპეტენციებით რთული IT ინფრასტრუქტურული გადაწყვეტები; IT უსაფრთხოების გადაწყვეტები; ინფორმაციის მართვა; Microsoft Business გადაწყვეტები; ვირტუალიზაციის გადაწყვეტები; ერთიანი საკომუნიკაციო გადაწყვეტები; ლიცენზირება და პროგრამული აქტივების მენეჯმენტი.
DPA მომსახურებას უწევს და მართავს IT ინფრასტრუქტურულ გადაწყვეტელებას, 1200-ზე მეტი კლიენტისათვის.
2007 წლის აგვისტოში DPA-ს მიენიჭა სერტიფიკატი ISO 9001, რომელიც ადასტურებს ხარისხის მართვის სისტემის მოთხოვნების შესრულებას, აღიარებს DPA-ს მიერ შეთავაზებულ ხარისხსა და მაღალ სტანდარტებს.
ქართულ ბაზარზე შემოსვლის შემდეგ DPA საქართველოში Microsoft-ის ერთადერთი ოქროს პარტნიორი იქნება. ამასთან, 2012 წლის ბოლომდე კომპანია გეგმავს 2 მლნ დოლარის ინვესტიციის განხორციელებას. იგი ამჟამად აღმოსავლეთ და ცენტრალური ევროპის საინფორმაციო ტექნოლოგიების ბაზრის ერთ-ერთი ლიდერია. მას ბალტიის ქვეყნების ბაზრის 60%-ზე მეტი უკავია, ხოლო უკრაინის ბაზრის - 38%, ბელორიის ბაზრის კი - 65%-ზე მეტი.
