საქართველოს ნოტარიუსთა პალატის თავმჯდომარემ ნინო ხოფერიამ საქართველოს ტექნიკური უნივერსიტეტის სტუდენტებს სერთიფიკატები გადასცა.
ხოფერიას განცხადებით, საქართველოს ტექნიკური უნივერსიტეტის სტუდენტები გაეცნენ საკანონმდებლო სიახლეებს, ნოვაციებს, რომლებიც ინერგება სანოტარო საქმიანობაში.
"მნიშვნელოვანია, რომ სტუდენტებმა თავად ნახეს, როგორ ხდება სანოტარო საქმიანობის პრაქტიკულად განხორციელება", - განაცხადა ხოფერიამ.
საქართველოს ტექნიკური უნივესიტეტის იურიდიული ფაკულტეტის 28-მა სტუდენტმა სანოტარო საქმიანობის პრაქტიკული სასწავლო კურსი სანოტარო ბიუროებში გაიარა. სწავლება ორთვიანი იყო. პრაქტიკულ საწავლებასთან ერთად, სტუდენტებს გააცნეს სანოტარო საქმიანობასა და კანონმდებლობაში დანერგილი ცვლილებები და სიახლეები.
საქართველოს ნოტარიუსთა პალატასა და საქართველოს ტექნიკურ უნივერსიტეტს შორის 2010 წლის 19 ნოემბერს გაფორმებული თანამშრომლობის მემორანდუმის საფუძველზე, ნოტარიუსთა პალატამ გამოთქვა მზადყოფნა, უზრუნველყოს სტუდენტთა პრაქტიკული სწავლება სანოტარო ბიუროებში.
მემორანდუმით გათვალისწინებული ღონისძიებები სტუდენტებს ხარისხიანი იურიდიული განათლების მიღებაში დაეხმარება, რაც სამომავლოდ მათ დასაქმებასა და პროფესიულ წინსვლას შეუწყობს ხელს.
