მსოფლიო ბანკმა 2010-2013 წლების საქართველოსთან თანამშრომლობის სტრატეგიის განხორციელების შუალედური ანგარიში წარმოადგინა. სტრატეგია შემუშავდა 2008 წლის აგვისტოს კონფლიქტის და გლობალური ეკონომიკური ვარდნის ორმაგი კრიზისის ფონზე. აღნიშნული სტრატეგია ეფუძნება ორ მიმართულებას: 1. კონფლიქტის შემდგომი საჭიროებების უზრუნველყოფა და მოწყვლადობის დაძლევა; 2. კონკურენტუნარიანობის გაძლიერება კონფლიქტის შემდგომ პერიოდში ეკონომიკის აღდგენის და ზრდის მიზნით.
"მოხარული ვართ, რომ მსოფლიო ბანკის მხარდაჭერით განხორციელებულ პროგრამებს კარგი შედეგები აქვს. ამიტომაც მსოფლიო ბანკი დამატებით გამოყოფს 235 მილიონ აშშ დოლარს მომდევნო ორი წლის განმავლობაში, რაც მიმართული იქნება ეკონომიკური ზრდის შენარჩუნებისა და მოწყვლადი მოსახლეობის საჭიროებების დაკმაყოფილებაზე. თანხის დიდი ნაწილი მოხმარდება ადგილობრივი და შიდასახელმწიფოებრივი გზების გაუმჯობესებას და რეგიონალურ განვითარებას", - განაცხადა მსოფლიო ბანკის რეგიონულმა დირექტორმა სამხრეთ კავკასიაში ასად ალამმა.
მსოფლიო ბანკის ინფორმაციით, 2009 წლიდან ბანკის მხარდაჭერით განხორციელებული პროგრამების ძირითადი მიღწევებია: განახლდა 600 კმ-მდე გზა და შეიქმნა 20,000 კაცი/თვე სამუშაო ადგილი; გზების გაუმჯობესების შედეგად უფრო ხელმისაწვდომი გახდა ბაზრები და სოციალური მომსახურება; აშენდა 7 ახალი სკოლა, სადაც 4,150 მოსწავლე სწავლობს და 300-ზე მეტი მასწავლებელი მუშაობს; სამედიცინო დარგის დაახლოებით 1800 მუშაკმა სპეციალური მომზადება გაიარა და ოჯახის ექიმი გახდა; ამბროლაურში აშენდა 25-საწოლიანი საავადმყოფო; გორში გაიხსნა პირველადი სამედიცინო დახმარების ცენტრი, რომელიც დაახლოებით 69,000 ბენეფიციარს ემსახურება (მათგან 10,000 იძულებით გადაადგილებული პირია); მიზნობრივი სოციალური დახმარების სქემა 408,367 ბენეფიციარს მოიცავს; გაფართოვდა გადასახადების ელექტრონულად დეკლარირების სისტემა, რომელმაც ყველა სახის გადასახადი მოიცვა. ამის შედეგად, 2010 წელს ყველა დეკლარაციის 75%-ი ელექტრონული ფორმით იყო წარდგენილი. მაგალითისთვის, 2009 წელს ეს მაჩვენებელი მხოლოდ 10%-ს უდრიდა.
ახალი პროგრამები მსოფლიო ბანკის მიერ დაფინანსდება IDA-ს 160 მილიონი აშშ დოლარით და IBRD-ის 75 მილიონი აშშ დოლარით. ამდენად, ბანკის მიერ საქართველოსათვის 2010 - 2013 წლებში გამოყოფილი IDA -ს და IBRDD-ის სახსრები შეადგენს 630 მილიონ აშშ დოლარს, მათ შორის 385 მილიონი აშშ დოლარი უკვე გაიხარჯა. ბანკის მიმდინარე საკრედიტო პორტფელი მოიცავს 10 საინვესტიციო პროექტს. მსოფლიო ბანკის ჯგუფის სასესხო პროგრამის ხელშეწყობა მოხდება ისეთ ძირითად საკითხებზე ორიენტირებული ანალიტიკური და საკონსულტაციო მომსახურებებით, როგორიცაა ზრდის წყაროები, ხარჯების ეფექტურობა, სიღარიბისა და უთანასწორობის ანალიზი, და უნარები.
ამასთანავე, IFC, მსოფლიო ბანკის ჯგუფის წევრი, განაგრძობს ინვესტიციებს კერძო სექტორში.
"გლობალურ ფინანსურ კრიზისზე რეაგირებისათვის ფინანსურ სექტორში განხორციელებული მსხვილი ინვესტციების შემდეგ IFC ორიენტირებულია სექტორებზე, რომლებიც აღმოფხვრიან გრძელვადიანი ზრდის წინაშე არსებულ წინააღმდეგობებს. ჩვენ საკმაოდ დიდ პოტენცალს ვხედავთ იმ სფეროების ათვისებაში, სადაც საქართველოს აქვს ბუნებრივი კონკურენტული უპირატესობა, მათ შორის განახლებადი ენერგია, სოფლის მეურნეობა და ინფრასტრუქტურა", - განაცხადა საერთაშორისო საფინანსო კორპორაციის რეგიონალურმა ხელმძღვანელმა კავკასიაში ტომას ლუბეკმა.
IFC - იმ ქვეყანასთან თანამშრომლობის მიმდინარე სტრატეგიის განხორციელება მას შემდეგ დაიწყო, რაც ინვესტიციების რეკორდულ მაჩვენებელს მიაღწია საქართველოში: 2009 ფისკალური წლის დასაწყისში IFC -იმ საქართველოში განახორციელა 224 მილიონი აშშ დოლარის მოცულობის ინვესტიცია, მათ შორის 190 მილიონი აშშ დოლარი ფინანსურ სექტორში. ქვეყანასთან თანამშრომლობის სტრატეგიის ფარგლებში IFC-იმ მოახდინა დამატებით 41 მილიონი აშშ დოლარის ინვესტირება საბანკო სექტორში რისკების მართვის სფეროში, მცირე და საშუალო ბიზნესისათვის განკუთვნილ სესხებსა და ვაჭრობის დაფინანსებაში, რათა ხელი შეუწყოს საბანკო სექტორის გაჯანსაღებას და დაეხმაროს ბანკებს გააუმჯობესონ ადგილობრივი კომპანიების სესხებისადმი ხელმისაწვდომობა. 2009 კალენდარულ წელს IFC-ის კლიენტებმა გასცეს დაახლოებით 5,220 სესხი მიკრო, მცირე და საშუალო ბიზნესისათვის და შედეგად მიკრო, მცირე და საშუალო ბიზნესისათვის გაცემული სესხების პორტფელმა 416 მილიონი აშშ დოლარი შეადგინა. IFC-იმ უზრუნველყო საკონსულტაციო მომსახურებების ფართო სპექტრი. ფინანსურ სექტორში აღნიშნული მოიცავს ტრენინგებსა და კონსულტაციებს კორპორატიულ მართვაში, ასევე შერჩეული ბანკების რისკისა და პორტფელის მართვასა და დიაგნოსტიკაში.
ამავე დროს IFC-იმ გააძლიერა ბიზნესის განვითარებისაკენ მიმართული ძალისხმევა უძრავი ქონების, სოფლის მეურნეობისა და ინფრასტრუქტურის სფეროებში. ფინანსური სექტორის გარდა, IFC- იმ უზრუნველყო სურსათის უვნებლობის გაუმჯობესების პროექტი საკვების მწარმოებელთათვის მიზნობრივი სემინარების მოწყობის გზით. IFC ასევე უწევს კონსულტაციებს მთავრობას მცირე და საშუალო საწარმოებისათვის საგადასახადო პოლიტიკის და პროცედურების გამარტივების საკითხებში.
ბანკში აცხადებენ, რომ მსოფლიო ბანკი განაგრძობს ყოვეწლიური განვითარების პოლიტიკის ღონისძიებების განხორციელებას, რაც ხელს შეუწყობს სოციალური უსაფრთხოების, ფისკალური ეფექტურობისა და კონკურენტუნარიანობის გაუმჯობესებას. გაიზრდება ინვესტიციები ადგილობრივ და შიდასახელმწიფოებრივ გზებში, რაც ხელს შეუწყობს ქვეყნის მასშტაბით რეგიონების დაკავშირებს და ხელმისაწვდომობას ბაზრებსა და საზოგადოებრივ მომსახურებებზე, განსაკუთრებით სოფლად. აღნიშნული ხელს შეუწყობს მოკლევადიანი სამუშაო ადგილების შექმნას და ეკონომიკურ გაჯანსაღებას. რეგიონალური განვითარების პროგრამა, რომელიც თავდაპირველად კახეთის რეგიონში განხორციელდება, მიმართული იქნება საზოგადოებრივი მომსახურებების მიწოდებაზე, თბილისსა და სავჭრო ადგილებს შორის სატრანსპორტო კავშირების უზრუნველყოფაზე და შერჩეულ სექტორებში ზრდის პოტენციალის მხარდაჭერაზე.
