გუდაურის სარეკრიაციო ტერიტორიაზე აზარტული თამაშების მოწყობა მოსაკრებლისგან თავისუფლდება. პირს, რომელიც გუდაურის სარეკრიაციო ტერიტორიაზე აზარტული და სხვა მომგებიანი თამაშების დაწესებულებებს, ასევე კაზინოებს (სამორინეებს) მოაწყობს, მოსაკრებლის გადახდა აღარ მოუწევს.
აღნიშნულთან დაკავშირებით ცვლილება შედის "სალიცენზიო და სანებართვო მოსაკრებლის შესახებ" კანონში.
დღეს არსებული ნორმის თანახმად, აზარტული და სხვა მომგებიანი თამაშების, ასევე კაზინოების (სამორინეების) მოწყობის ნებართვისთვის საქართველოს მთელ ტერიტორიაზე (გარდა ბათუმისა, დუშეთის მუნიციპალიტეტის ბაზალეთის ტბის მიმდებარე ტერიტორიასა, დაბა ბაკურიანის ტერიტორიისა, ქობულეთის, ბორჯომის, წყალტუბოსა და სიღნაღის მუნიციპალიტეტების ტერიტორიებისა) 5 000 000 ლარია დაწესებული.
წარმოდგენილი კანონპროექტით კი, ტერიტორიული ერთეულების ჩამონათვალს, სადაც კაზინოს მოწყობა მოსაკრებლისგან თავისუფლდება, გუდაურიც ემატება.