კალიფორნიელი ჰეროლდ კემპინგი ამტკიცებს, რომ დედამიწის მოსახლეობის 2% ცად "ამაღლდება", ხოლო დანარჩენი პირდაპირ ჯოჯოხეთში მოხვდება.

ამერიკელმა ქადაგმა სამყაროს დასასრულის ზუსტ თარიღად 2011 წლის 21 მაისის 18:00 საათი დაასახელა.

ამერიკელების ნაწილი მიიჩნევს, რომ კემპინგის გაფრთხილების იგნორირება თითქმის შეუძლებელია. 86 წლის ქადაგი ყოფილი ინჟინერია, რომელიც რელიგიური რადიოსადგურის საშუალებით, ტალღაზე Family Radio Network ყოველდღიურად მიმართავს მიმდევრებს.

ჰეროლდ კემპინგი აცხადებს, რომ 70 წლის განმავლობაში შეისწავლა ბიბლია და ისეთი სისტემა შეიმუშავა, რომელიც მათემატიკური გათვლის საშუალებით წინასწარმეტყველების გაშიფვრის საშუალებას აძლევს.

მისი სიტყვებით, სამყაროს დასასრული 21 მაისს დადგება, რადგან ამ რიცხვში ქრისტეს ჯვარზე გაკვრიდან 722 500-ე დღე სრულდება. კემპინგისთვის კი 722 500 მნიშვნელოვანია, რადგან იგი სამი წმინდა რიცხვის (5-10-17) ერთმანეთზე ორჯერ გამრავლებით მიიღება.

"ქურდობა, ძარცვა, ბოროტება, საზოგადოების სექსუალური გადაგვარება, გეი-პარადები რაღაცას გვეუბნება და გვაფრთხილებს. ეს ყველაფერი ღმერთმა დასასრულის ნიშნად გამოგვიგზავნა", _ აცხადებს კემპინგი.

კრიტიკოსები აღნიშნავენ, რომ კემპინგი აპოკალიფსს პირველად არ წინასწარმეტყველებს. 1994 წლის 6 სექტემბერს ალამედას (კალიფორნია) დარბაზში შეკრებილი ასობით მისი მომხრე ქრისტეს მოსვლას ამაოდ ელოდა.