საერთაშორისო სავალუტო ფონდი (სსფ) საქართველოში ინფლაციის მაჩვენებლის შემცირებას მიმდინარე წლის ივნისიდან ელოდება. საქართველოში სსფ-ის მუდმივი წარმომადგენელის ედუარდ გარდნერის განცხადებით, ამის წინაპირობა საწვავსა და საკვებ პროდუქტებზე ფასების შემცირება იქნება.
ფონდი ვარაუდობს, რომ მარტში დაფიქსირებული 14%-იანი ინფლაცია წლის ბოლომდე 8,5%-იან ნიშნულამდე შემცირდება.
"სამომავლოდ ინფლაცია კვლავაც შემცირდება საქართველოს ეროვნული ბანკის (სებ) საშუალოვადიანი ორიენტირის შესაბამისად", - განაცხადა გარდნერმა.
მისი თქმით, ფონდის მისიის შეფასებით, საბაზო ინფლაცია (საწვავისა და საკვების ფასების გარეშე) დაბალია და 2%-ის დონეზეა; ქვეყნის მონეტარული პოლიტიკა შესაფერისია და შეესაბამება ინფლაციის კლების მიზანს.