ახალციხეში 500/400/220 კვ ქვესადგურისა და მუდმივი დენის ჩანართის მშენებლობა ოფიციალურად დღეს დაიწყო. სახელმწიფო ელექტროსისტემის ინფორმაციით, ეს არის შავი ზღვის ელექტროგადამცემი ქსელის პროექტის შემადგენელი ნაწილი, რომელიც შპს. "საქართველოს სახელმწიფო ელექტროსისტემისა" და მისი შვილობილი კომპანიის "ენერგოტრანსის" მიერ ხორციელდება. თავად შავი ზღვის ელექტროგადამცემი ქსელის პროექტი, გარდა აღნიშნულისა, მოიცავს რამდენიმე მნიშვნელოვან კომპონენტს. მათ შორის: ახალციხის, ზესტაფონისა და გარდაბნის ქვესადგურების ურთიერთმაკავშირებელი ელექტროგადამცემი ხაზების "ვარძია500", "ზეკარი500" და თურქეთის საზღვართან ბორჩხაში მაკავშირებელი ხაზების მშენებლობას, რომელსაც ახორციელებს ინდური კომპანია KEC International-ი, ახალციხის ქვესადგურის სამშენებლო სამუშაოებს "SIEMENC-Austria" ახორციელებს, ხოლო მუდმივი დენის ჩანართს დაამონტაჟებას - SIEMENC Germany".
პროექტის ოფიციალურ გახსნას საქართველოს ენერგეტიკისა და ბუნებრივი რესურსების მინისტრის მოადგილე მარიამ ვალიშვილი, KfW-ს აღმოსავლეთ ევროპის, კავკასიისა და ცენტრალური აზიის რეგიონალური ოფისის პირველი ვიცე-პრეზიდენტი ევა ვიტი, EBRD-ის კავკასიის, მოლდოვის და ბელორუსიის რეგიონალური დირექტორი პოლ ჰენრი ფორესტიერი და სხვა დონორი ბანკებისა და სამშენებლო კომპანიების ("SIEMENC-Austria", SIEMENC-Germany და KEC International-ის წარმომადგენლები, შპს "საქართველოს სახელმწიფო ელექტროსისტემის" მმართველთა საბჭოს თავმჯდომარე სულხან ზუმბურიძე და შპს "ენერგოტრანსის" დირექტორი კახა სეხნიაშვილი დაესწრნენ. როგორც სსე-ში განმარტავენ, გახსნაზე მხარეებმა მიწაში ჩაფლეს მომავლის კაფსულა პროექტის შესახებ შემცველი ინფორმაციით.
ახალციხის 500/400/220 კვ ქვესადგურისა და მუდმივი დენის ჩანართის პროექტის საკონტრაქტო ღირებულებაა: 158,8 მლნ ევრო. მთლიანად შავი ზღვის ელექტროგადამცემი ქსელის პროექტის დასაფინანსებლად ევროპის რეკონსტრუქციისა და განვითარების ბანკმა (EBRD) გამოყო - 80 მლნ ევრო; ევროპის საინვესტიციო ბანკმა - 80 მლნ ევრო; გერმანიის რეკონსტრუქციის საკრედიტო ბანკმა (KfW) -100 მლნ ევრო; საქართველოს მთავრობამ -53 მლნ ევრო; NIF(ევროკავშირი) გრანტი - 8 მლნ ევრო. პროექტის ეფექტურობის თარიღია 2010 წლის 1 სექტემბერი, მისი დასრულების თარიღია 2013 წლის მაისი.
საქართველო პირველი ქვეყანაა კავკასიის რეგიონში, სადაც მუდმივი დენის ჩანართი იქნება დამონტაჟებული. მსოფლიოში სულ თითზე ჩამოსათვლელი ქვეყნებია მსგავსი ჩანართის მქონე ენერგოსისტემებით. მუდმივი დენის ჩანართი არის გამმართველი მოწყობილობა, რომელიც 500კვ-ის მხარიდან ცვლად დენს გარდაქმნის მუდმივ დენად და შემდეგ მას დანაკარგების გარეშე, შეუფერხებლად ისევ გარდაქმნის ცვლად დენად ოღონდ 400კვ-ზე, თურქეთისკენ მიმავალ მხარეზე, ისე რომ ეს არ გამოიწვევს ავარიულ სიტუაციას ჩვენი მეზობელი ქვეყნის ენერგოსისტემაში. რაც შეეხება მთლიანად პროექტის მნიშვნებლობას, აღნიშნული პროექტის განხორციელებას უდიდესი როლი ენიჭება ქვეყნის ენერგოსისტემის გამართული მუშაობისათვის. კერძოდ, პროექტის საბოლოო შედეგია: ქვეყნის ენერგოსისტემის მუშაობის მდგრადობის უზრუნველყოფა; სამხრეთ საქართველოს რეგიონის ელექტროენერგიით მომარაგების იმედიანობის გაუმჯობესება; ქვეყანაში ზაფხულის პერიოდში ენერგობალანსში ნამეტი ელექტროენერგიის ექსპორტის შესაძლებლობა თურქეთში, საქართველოსა და თურქეთის ენერგოსისტემების მაკავშირებელი მშენებარე ხაზის საშუალებით; ელექტროენერგიის იმპორტ-ექსპორტისა და ტრანზიტის განხორციელება; ელექტროენერგიის კარგვების მნიშვნელოვანი შემცირება.
