"აბბი ასეტ მენეჯმენტსა" და "კაუკაზუს აგროდეველოფმენთს" (კად) შორის საინვესტიციო ფონდის მართვის მომსახურების ხელშეკრულება შეწყდა. ამის შესახებ ინფორმაციას უმხსვილესი დამოუკიდებელი აქტივების მართვის კომპანია "აბბი ასეტ მენეჯმენტი" (აბბი) ავრცელებს.
საინვესტიციო მომსახურების ხელშეკრულების შეწყვეტის პირობის შესაბამისად, აბბი კად-ს საინვესტიციო მომსახურებას მომავალი 6 თვის განმავლობაში კვლავაც გაუწევს, ხოლო 2011 წლის 30 ოქტომბრიდან მართვის მომსახურება საბოლოოდ შეწყდება. ხელშეკრულების შეწყვეტის მიზეზი გახდა აბბი-ს მენეჯმენტსა და კად-ის აქციონერთა შორის უთანხმოება კომპანიის სტრატეგიული განვითარების მიმართულებასთან დაკავშირებით. ამასთანავე, აბბი-ს გენერალურმა დირექტორმა ბიძინა ბეჟუაშვილმა დაწერა განცხადება კად-ის სამეთვალყურეო საბჭოს თავმჯდომარის თანამდებობიდან გადადგომის შესახებ.
2008 წელს კად-ი ჩამოყალიბდა აბბი-ს უშუალო ხელმძღვანელობით და ინიციატივით. აბბი-მ მნიშვნელოვანი წვლილი შეიტანა მეცხოველეობის პროექტის "უნიფარმის" განვითარების პროცესში. "უნიფარმი" წარმოადგენს ერთადერთ რძის პროდუქტების მწარმოებელ კომპანიას საქართველოში, რომელსაც აქვს წარმოების სრული ჯაჭვი. "უნიფარმის" რძის პროდუქცია
იყიდება დასავლეთ საქართველოში "ფაქიზოს" ბრენდით.
აბბი რჩება უმსხვილეს დამოუკიდებელ აქტივების მმართველ კომპანიად საქართველოში და საინვესტიციო მომსახურებას უწევს ენერგო ფონდს "კაუკაზუს ენერჯი ენდ ინფრასტრაქჩას" და უმსხვილეს საპენსიო ფონდს საქართველოში "ალდაგი ბისიაის საპენსიო ფონდს".
"კად-თან მომსახურების შეწყვეტა გამოიწვია ჩვენსა და კად-ის აქციონერს შორის არსებულმა განსხვავებულმა სტრატეგიულმა ხედვამ კომპანიის სამომავლო გეგმებთან დაკავშირებით. კად-ის მთავარი ინვესტიცია "უნიფარმი" ერთ-ერთი ყველაზე საინტერესო პროექტი იყო აბბი-სთვის და გვსურს "უნიფარმს" ყოველივე საუკეთესო ვუსურვოთ", - აღნიშნა "აბბი ასეტ
მენეჯმენტის" გენერალურმა დირექტორმა ბიძინა ბეჟუაშვილმა.