ირანიდან სამი ქუვეითელი დიპლომატი გააძევეს. ამის შესახებ ინფორმაციას ირანული ტელეკომპანია ავრცელებს.
ტელეკომპანიის ცნობით, თეირანის აღნიშნული გადაწვეტილება ქუვეითიდან 2 აპრილს ირანელი დიპლომატების გამოძევებას უკავშირდება.
როგორც ცნობილია, მარტის დასასრულს ქუვეითში იმ პირთა ჯგუფის სასამართლო პროცესი დასრულდა, რომლებიც ეჭვმიტანილები იყვნენ ირანის სასარგებლოდ ჯაშუშობაში.
განსასჯელთაგან სამს სიკვდილით დასჯა შეეფარდა, ერთს უვადო პატიმრობა, რამდენიმე დაკავებული კი გაამართლეს. მოგვიანებით ცნობილი გახდა, რომ ქუვეითის ხელისუფლებამ ქვეყნიდან სამი ირანელი დიპლომატი გააძევა, რომლებიც აგენტებთან კავშირში იმყოფებოდნენ. ოფიციალური თეირანი კი აღნიშნულ ბრალდებას უსაფუძვლოს უწოდებს და აცხადებს, რომ მას ჯაშუშებთან არანაირი კავშირი არ ჰქონია.
სკანდალი, როგორც ირანის საგარეო საქმეთა მინისტრი ალი აკბარა სალეხი აცხადებს, "ინსპირირებულია არაკეთილმოსურნეების" მიერ, რომელთა ინტერესებში არ შედის "რეგიონში ისლამური სახელმწიფოების მშვიდობიანი ურთიერთობები".