საქართველოს კათალიკოს-პატრიარქი, მცხეთა-თბილისის მთავარეპისკოპოსი, ცხუმ-აფხაზეთის მიტროპოლიტი ილია მეორე სმოლენსკში, ერთი წლის მომხდარ ავიაკატასტროფას გამოეხმაურა.
"ერთი წელი გავიდა მას შემდეგ, რაც კატასტროფაში გარდაიცვალა პოლონეთის პრეზიდენტი ლეხ კაჩინსკი და მისი მეუღლე მარია კაჩინსკაია. ეს იყო საშინელი ტრაგედია მთელი მსოფლიოსთვის. 92 ადამიანი გარდაიცვალა იმ კატასტროფაში. ჩვენ აღვავლენთ ლოცვებს, რომ უფალმა ნათელში ამყოფოს მათი სულები", - ბრძანა პატრიარქმა დღეს, სამების საკათედრო ტაძარში, საკვირაო ქადაგებისას.
ამასთან, ილია მეორემ დღესვე სამებაში შეკრებილ მრევლს მარიამ ეგვიპტელის ხსენების დღე მიულოცა და წმინდანის ცხოვრებაზე ესაუბრა. პატრიარქმა ტაძარში მყოფი მგალობლებიც დალოცა.
შეგახსენებთ, რომ სმოლენსკში მომხდარი ტრაგედიიდან, რასაც პოლონეთის პრეზიდენტი ლეხ კაჩინსკი, მისი მეუღლე მარია კაჩინსკა და პოლონური პოლიტიკური ელიტის 90-ზე მეტი წარმომადგენელი ემსხვერპლა, დღეს ერთი წელი შესრულდა.