დღეს, 10 აპრილს, 20.00 საათზე თბილისის ვანო სარაჯიშვილის სახელობის სახელმწიფო კონსერვატორიის დიდ საკონცერტო დარბაზში კლასიკური მუსიკის საღამო გაიმართება. საღამოს ორგანიზატორია საქართველოს კულტურისა და ძეგლთა დაცვის სამინისტრო.
კონცერტი 2010 წლის 10 აპრილს ავიაკატასტროფაში ტრაგიკულად დაღუპული პოლონეთის მერვე პრეზიდენტის ლეხ კაჩინსკისა და მისი მეუღლის მარია კაჩინსკას, ასევე, მათთან ერთად გარდაცვლილი 94 ადამიანის ხსოვნას ეძღვნება.
საღამოს დაესწრებიან საქართველოს კულტურისა და ძეგლთა დაცვის მინისტრი ნიკოლოზ რურუა, პოლონეთის საგანგებო და სრულუფლებიანი ელჩი საქართველოში ურსულა დორუშევსკა, საქართველოში აკრედიტებული დიპლომატიური კორპუსის წარმომადგენლები, სხვა ოფიციალური პირები და ხელოვანები.
ასევე, კონცერტში მონაწილეობას მიიღებენ თბილისის ვანო სარაჯიშვილის სახელობის სახელმწიფო კონსერვატორიის რექტორი მანანა დოიჯაშვილი, კამერული ორკესტრი "საქართველოს სინფონიეტა", გორის ქალთა კამერული გუნდი და სულხან ცინცაძის სახელობის საქართველოს ეროვნული სიმებიანი კვარტეტი.
