"განცვიფრებული ვარ, რა გამძლე ქვეყანაა საქართველო, რომ ყველაფერს უძლებს - ცრემლს, სისხლსა და ტკივილს",- განაცხადა "დემოკრატიული მოძრაობის" აღმასრულებელი საბჭოს წევრმა, რეჟისორმა რეზო ესაძემ "ჯი-ეიჩ-ენთან" საუბრისას.
მისი თქმით, უახლოეს ხანში ყველაფერი უკეთესობისკენ უნდა შებრუნდეს, წინააღმდეგ შემთხვევაში, მომავალი თაობები წინამორბედებს დაწყევლიან.
"ჩვენმა თაობამ უნდა მოასწროს და სირცხვილის ნიშანი მოიწმინდოს სახიდან. მომავალს ნაოცნებარი საქართველო უნდა დავუტოვოთ. ბოლოს და ბოლოს, აუცილებელია რაღაც კონკრეტულის ჩამოყალიბება, ფარისევლობა უნდა დამთავრდეს. უნდა დასრულდეს ზურგსუკან სიტყვის დამალვა",_აცხადებს რეზო ესაძე.
მისი თქმით, საქართველოში ქართველი კაცი თავისი მაღალი სურვილების შესრულების იმედად უნდა იყოს, საკუთარ სამშობლოში ქართველი კაცი დევნილობაში არ უნდა ცხოვრობდეს.
"სანახევრო სამშობლო არ არსებობს, სამესამედოდ სამშობლო არ არსებობს. სამშობლო ან არის, ან_არ არის. ჯერჯერობით, სამშობლო მხოლოდ ტკივილებითაა სავსე. ჯერ სატრაბახო არაფერი გვაქვს, გარდა იმისა, რომ 9 აპრილი ერთდროულად სევდისა და იმედის დღეა. 9 აპრილი ხატივით საფიცარი გახდა. სიცოცხლის ორმხრივობის ერთდროული განცდა და აქედან კი მთელი ისტორიის წაკითხვა მომავლის საფუძველია",_მიიჩნევს რეზო ესაძე.