"ყველა ქართველისთვის 1989 წლის 9 აპრილი ძალიან მტკივნეული, ტრაგიკული დღე იყო. მახსოვს ორი განცდა, რომელიც იმ დღეს მქონდა. ერთი იყო დიდი სიამაყის განცდა იმის გამო, რომ მთელი ქართველი ერი ერთ მუშტად იყო შეკრული და ცარიელი ხელებით შემართული იბრძოდა დამოუკიდებლობისა და ღირსებისათვის. მეორე მხრივ, ეს იყო უდიდესი ტკივილი იმ უბედურების გამო, რომელიც ამ დღეს მოხდა",_აღნიშნა დემოკრატიული მოძრაობის ლიდერმა ნინო ბურჯანაძემ "ჯი-ეიჩ-ენთან" საუბრისას.
მისი თქმით,სამწუხაროა, რომ 20 წლის შემდეგაც კვლავ არ გვაქვს შესრულებული ის მთავარი ამოცანა და მიზანი, რომელიც იმ დღეს იყო და, რომლისთვისაც 9 აპრილს პარლამენტის წინ იბრძოდნენ ადამიანები. ამასთან, ბურჯანაძე უსურვებს ქვეყანას, მომავალი წლიდან ღირსეულ საქართველოში იცხოვრონ.
"სამწუხაროდ, დღესაც არ არის ჩვენი ქვეყანა ერთიანი, რეალურად დამოუკიდებელი. ისევე როგორც 20 წლის წინ, საქართველოს დღესაც სჭირდება ერთ მუშტად შეკვრა, რათა ჩვენი ქვეყანა გახდეს ერთიანი, ძლიერი, თავისუფალი, დემოკრატიული და ღირსეული. ისე, რომ ყველა ადამიანს თავისი ღირსების და განუყოფელ სამშობლოში ცხოვრების საფუძვლიანი განცდა ჰქონდეს",_აღნიშნა ბურჯანაძემ.
შეგახსენებთ, დღეს დემოკრატიული მოძრაობის წევრებმა 9 აპრილს დაღუპულთა ხსოვნას პატივი მიაგეს.
