ივანე ჯავახიშვილის სახელობის თბილისის სახელმწიფო უნივერსიტეტში გაიხსნა გამოფენა "უნივერსიტეტის პირველი სტუდენტები". ღონისძიება თბილისის სახელმწიფო უნივერსიტეტის მუზეუმისა და საქართველოს იუსტიციის სამინისტროს ეროვნული არქივის ერთობლივი ორგანიზებით გაიმართა.
"ექსპოზიციის მიზანია თბილისის სახელმწიფო უნივერსიტეტის პირველი სტუდენტების სასწავლო პროცესის ჩვენება. გამოფენაზე წარმოდგენილია ათი სტენდი, რომელიც სტუდენტებისა და ასპირანტების სასწავლო პროცესის ამსახველ ფოტო და დოკუმენტურ მასალას მოიცავს. ჩვენ გვსურდა 1918-1922 წლების ატმოსფერო გადმოგვეცა", - აღნიშნა თსუ-ის მუზეუმის ხელმძღვანელმა მაია გურაბანიძემ.
ექსპოზიციაზე წარმოადგინეს უნივერსიტეტის სტუდენტებისა და ასპირანტების, შემდგომში ცნობილი მეცნიერების და საზოგადო მოღვაწეების - ვერა ბარდაველიძის, სერგი მაკალათიას, არნოლდ ჩიქობავას, ვარლამ თოფურიას და სხვების პირადი საქმეები, ფოტოები და საკურსო ნამუშევრები. ასევე გამოიფინა სტუდენტთა შეფასების ბარათები და ის სარეკომენდაციო წერილები, რომლებსაც უნივერსიტეტის დამფუძნებლები და მასწავლებლები მათ შესახებ წერდნენ.
გამოფენის გახსნის შემდეგ უნივერსიტეტის მუზეუმს გადაეცა უნივერსიტეტის გამომცემლობის ხელმძღვანელის თათია ებრალიძის წინაპრის, უნივერსიტეტის ერთ-ერთი პირველი სტუდენტის, თამარ ჟღენტის ჩათვლის წიგნაკი. ღონისძიების დასასრულს კი, თსუ-ის რექტორი ალექსანდრე კვიტაშვილი თბილისის სახელმწიფო უნივერსიტეტის უხუცეს პროფესორებს შეხვდა.