საპარლამენტო უმრავლესობას იმედი აქვს, რომ ისრაელის მხრიდან გაკეთებული განცხადება საქართველოში ებრაელი ტურისტების და ბიზნესმენების შემოსვლას არ შეამცირებს. ამის შესახებ საპარლამენტო უმრავლესობის ლიდერმა პეტრე ცისკარიშვილმა ჟურნალისტებს ისრაელის მიერ გავრცელებული განცხადების შეფასებისას განუცხადა.
"ტერორიზმის საფრთხე ყველამ კარგად ვიცით, საიდანაც მოდის და არ ვფიქრობ, რომ ათი ათასობით ტურისტი შეწყვეტს საქართველოში სიარულს, რადგან კარგად იცინ, რომ ჩვენს ქვეყანაში კრიმინალური ვითარება მაღალ დონეზეა დარგეულირებული, საფრთხეები პრაქტიკულად არ არსებობს", - აღნიშნა ცისკარიშვილმა.
დეპუტატმა იმედი გამოთქვა, რომ ისრაელის მხარის მიერ გავრცელებული განცხადება არ გახდება იმის საფუძველი, რომ საქართველოში ისრაელიდან ბიზნესმენებისა და ტურისტების შემოსვლა იკლებს, მაშინ, როცა მათი მხრიდან საქართველოთი ინტერესი ბოლო დროს განსაკუთრებით გაზრდილია.
შეგახსენებთ, რომ ისრაელის ტერორიზმთან ბრძოლის შტაბმა, რომელიც ნაციონალური უსაფრთხოების საბჭოში შედის, გაავრცელა განცხადება, რომელშიც არის რეკომენდაცია ისრაელის მოქალაქეებისთვის, პასექის დღესასწაულის წინა დღეებში თავი შეიკავონ საქართველოსა და სომხეთში გამგზავრებისგან.
განცხადების მიხედვით, ამ ქვეყნებში არსებობს საფრხე იმისა, რომ მათ მოიტაცებენ "ჰეზბოლას" ან "ჰამასის" ტერორისტები. განცხადებაში ასევე ნათქვამია, რომ ყოფილი საბჭოთა კავშირის ქვეყნებში არის "კონკრეტული საფრთხე".
